Thursday, September 4, 2014

රට ගිය ඇත්තෝ.......

2014 බිනර මස 04වනදා

දිනය : 2005 ඔක්තෝබර් 27
දවස : බ්‍රහස්පතින්දා
වේලාව : මධ්‍යම රාත්‍රියට ආසන්නයි.

මැදපෙරදිග වූ එක්තරා දියුණුයැයි සම්මත නූතන නගරයකි. එහි වූ දහසකුත් එකක් අති නවීන උස් ගොඩනැගිලි අතරින්, එක් සුවිශේෂී ගොඩනැගිල්ලක විසි එක් වන මහලයේ වූ මහල් නිවාසයක් අභ්‍යන්තරයෙහි පිහිටි කාමරයෙකි. බැලූ බැල්මට ස්ත්‍රීන්ගේ වාසස්ථානයක්යැයි සිතිය හැකි ලක්ෂණ එයින් විද්‍යාමාන විය. නිසි පිළිවෙළ, මේසයක් මත වූ මල් බඳුන, විශාල අජීවී පැන්ඩාවන් දෙදෙනෙකු එයින් සමහරක් පමණකි. බිත්තියෙහි අලවා තිබූ විශාල ප්‍රමාණයේ මනරම් දර්ශනයකි. එහි අති අලංකාර වෙරළ තීරයක් දක්නට වූ අතර යටින් "ලස්සන පිලිපීනය" යනුවෙන් ඉංග්‍රීසි භාෂාවෙන් ලියා තිබුණි. එහි සයනයන් ද්විත්වයක් වූ බැවින් තරුණියන් දෙදෙනෙකු වසනා බව වටහා ගැනීම එතරම් අපහසු නොවේ. නමුත් මෙහි ඇති විශේෂත්වය මේ කිසිවක් නොවේ. මේ කියනා මොහොතේ මෙම කාමරයෙහි වූ පැන්ඩාවන් දෙදෙනාගෙන් එකෙකු එක සයනයෙක පහසුවෙන් වැතිර සිටිනා විටම අනෙක් පැන්ඩාවා අනෙක් සයනය අසල බිම පතිතව සිටිනු දක්නට හැකි විය. ඉතින් එහි ඇති විශේෂත්වය කුමක්ද ? ඔබ එසේ අසනු ඇත. විශේෂත්වයනම් එම මොහොතේම බිම වැටී සිටි පැන්ඩාවා අසළවූ සයනය මත විශාල ගිනි ජාලාවක් බුර බුරා නැගීමයි. ගින්නකට අවැසි සියලු සාධක මනාව එකතුව පැවති බැවින් එහි ගිනි ජාලා විහිදුවමින් බුර බුරා නැගෙනා ගින්නකි. විටෙක එකිනෙකා වෙලෙමින් සයනයෙන් ඉහලට නැගෙනා ගිනි දළු, විටෙක සයනයටම ඇලී ගිලී යති. ගින්නකට හසුවූ වියළි දණ්ඩක් ඇබරී, මිරිකී දැවී හළු වී යන අයුරු සිහිගන්වමින් මෙම ගින්නෙහි ප්‍රබලතාවයට හසුවූ සයනය ඇබරෙමින්, මිරිකෙමින් චලනය වෙමින් තිබිණි. ලෝකයන් දෙකක් මුලු මනින්ම දවා හළු කළ හැකි තරම් වූ අති ප්‍රබලව නැගෙනා ගින්නකි ඒ.

එහෙත් පුදුමයකි ! සිගරට් දුමාරයකට පවා අති සංවේදීව ක්‍රියාත්මක වන අති ප්‍රබල සංවේධකයන් මෙම ගිනි ජාලාවන් දෙස බලා නිසලව සිටියහ. හැකිතරම් වීරිය දමා කෑගසා මුළු ලොවටම මේ ගින්නෙහි පණිවිඩය දැනුම් දිය යුතු උවත් ඔවුන්ද වගේ වගක් නොමැතිව සිටී. සමහර විට ඔවුන් ගින්න රසවිඳිනවා විය හැකියැයි හිතෙනා තරමට නිහඬය. එබැවින්ම එම ගින්න මුළු ලෝකයටම රහසක්ව නිවී යාමට වුවත් බැරි නැත.

OOOOO

අබුඩාබි නගරයට තවත් සති අන්තයක් උදා කරමින් ඒ බ්‍රහස්පතින්දා සවස හිරු අවරට යමින් පැවතුණි. උදයේ සිට නොකඩවා වැඩ කිරීම හේතුකොටගෙන ඇතිවූ වෙහෙසත් සමඟින් කුසල් සිය කාමරය වෙත පියනගිමින් සිටී. කලකට පසු ඔහුට නියමිත වේලාවට සේවය අවසන් කිරීමේ හා සති අන්තයෙහි නිවාඩුව ගැනීමෙහි භාග්‍ය උදාවූ තිබූ බැවින් ඔහු සිටියේ සතුටිනි. ශීත කාලය අත ළඟම පැමිණෙන බවට ඉඟි දෙමින් ගතෙහි දැව‍ටුණ සිසිලස ඔහුගේ එම සතුට තීව්‍ර කළේය. කාර්‍යය බහුල අබුඩාබි නගරයෙහි මාවත් දිගේ පා නගමින් සිටියද ඔහුගේ සිත තිබුණේ ඉන් සැතපුම් දහස් ගාණක් එපිටිනි. විනාඩි පහලවක පමණ ඇවිදීමකින් අවසානයේදී ඔහු සිය නවාතැන්පල වූ කාමරයට ළඟා වීමට සමත් විය. එය ඔහු තවත් තරුණයන් දෙදෙනෙකු හා හවුලේ පරිහණය කෙරුවේ වියදම් අවම කරවා ගැනීමේ අරමුණිනි. මේ කියන දිනයේ එහි වූයේ කුසල් හා තවත් එක් සගයෙකු වූ ජගත්  පමණී. තෙවෙනියා වූ දර්ශන කෙටි නිවාඩුවක් සඳහා ලංකාවට ගොසිනි.

කාමරයට පැමිණි කුසල්, සිය ඇඳුම් මාරු කර නොගමින්ම ජංගම පරිගණකය ක්‍රියාත්මක කරවූයේ ස්කයිප් හරහා නිවස හා සම්බන්ධ වීමටය. මෙය දෛනික ක්‍රියාකාරකමකි.

‍ටුක් ‍ටුක් ‍ටු‍ටුට් ‍ටුට් ‍ටුට් අනුකරණයෙන් එය අනෙක් පසින් වූ බිරිඳගේ ගිණුම හා සම්බන්ධ වීමට දරණ උත්සහය දෙස මද වේලාවක් බලා සිටින විට තිරය මතා සිනා මුවින් යුතු කුසල්ගේ බිරිඳගේ රුව දර්ශනය විය.

"කොහොමද ?"

"හොඳයි.."

"වැඩ අඩුද අද ? අද වේලාසනින්"

"හ්ම්ම්ම් "

"කෝ පුතාලා ? "

"ආහ් ඔය ඉන්නේ ටී වී එකේ එල්ලිලා.."

"පාඩම් කරලද ඔය ඉන්නේ ?"

"පොඩ්ඩනම් කළා, අරයව ඉතින් මරන්න ගෙනියන්න ඕනා ඒකට."

"එහෙමද ? බලමුකො.. හැමෝම ඉතින් ඉගන ගන්න මනාප නෑනේ.. අඩුම ගානේ විභාග ටිකවත් ගොඩ දාගත්තොත් මදෑ.. "

හෝරා යන්ත්‍රයෙහි සවස හයයි තිහ සටහන් වන විට ඔවුන් බොහෝ දේ පිළිබඳව කතා බහ කළහ. යමින් එමින් පරිගනකයට ඔළුව දැමූ දරු දෙදෙනා නිසා මාතෘකා වෙනස් වුවද එය ඔවුනට බාධාවක් නොවුනි.

"ආ... ක්‍රෙඩිට් කාර්ඩ් බිල් එක ගෙව්වද ? අද අන්තිම දවස" හදිසියේ මතකයට නැගුනු එම පැණය කුසල්ගෙන් බිරිඳටය. එවිටම අනෙක් පසින් නළලෙහි අත ගසා ගන්නා බිරිඳගේ රුව දු‍ටු කුසල්ගේ මුහුණ අඳුරු විය.

"අයියෝ අමතක වුනානෙ"

"විහිළුද කරන්නෙ ? " කුසල්ගේ ස්වරයට කෝපය මුසු වී තිබිණි.

"නෑ ඇත්තමයි.. අමතක වුනා අනේ."

"තමුසෙට මොන විකාරයක්ද හලෝ වෙලා තියෙන්නෙ? දැන් මේ තුන් වෙනි පාරනෙ ඕක අමතක කරපු !"

"හයියෝ ඉතින් අමතක වුනානෙ.. මම හිතලා අමතක කරා නෙමේනෙ.."

" අමචක වුනා ..! මම ඊයෙත් මතක් කරපු එක අද අමතක වුනා..? ඊයෙ ගෙවන්න කිව්වා ඒක කළේ නෑ අදට කල් දැම්මා. ඔච්චර කියද්දිනෙ ඕක අමතක කළේ. තමුසෙ මොන ලෝකෙද ඉන්නෙ ? මම මේහෙ ඉඳන් සල්ලි අච්චු ගහනවා කියලා හිතුවද ඔහොම නිරපරාදෙ නාස්ති කරන්න. එක පාරක් දෙපාරක්නම් කමක් නෑ.. තුන් පාරක් කියන්නෙ ! මම මේ බලනවා කීයක් හරි එකතු කරන් මේ අපායෙන් ඉක්මනට එන්නෙ කොහොමද කියලා.. මුන්ට විහිළු........." ඔහුගේ වත කෝපයෙන් රතු පැහැ ගැන්වී තිබිණි.

"අයියෝ ඔච්චර කියවන්න එපා අනේ.. මේ පොඩි වැ‍රැද්දකට. කොච්චර කළත් කවදාවත් හොඳක්නම් අහන්න නෑ, එත් පොඩි වැ‍රැද්දක් තිබුනොත් ගිරිය පුප්පන් කෑ ගහනවා."

"පොඩි!? පොඩි වැ‍රැද්ද...? අනේ මගේ කට.." ඇයගේ එකටෙක කීම ඔහුගේ කෝපය උත්සන්න කෙළේය. "චටාස්" අනුකරනයෙන් ලැප් ටොප් එක වසා දැමූ කුසල් සයනයෙන් නැගී සිට, ඇඳුම් මාරු කොට නාන කාමරයට වැදුනේ නොනවත්වා බෙරිහන් දුන් ජංගම දුරකතනයද නොතකාය. ඇමතුම කාගෙන්දැයි කීමට ඔහුට දුරකතනයෙහි තිරය බැලීමට උවමනා නොවුනි. නාන කාමරයේ දොර වැසෙන විටම වාගේ කාමරයෙහි දොර ඇරෙනු ඇසුනු හෙයින් සිය සගයාගේ පැමිණීමද ඔහුට සංවේදනය විය.

OOOOO

යාන්ත්‍රිකව සයනයට බරවූ ජගත් සිය පරිගනකය දිගෑරගත්තේ ප්‍රිය බිරිඳව ඇමතීමටය. 

"කොහොමද ඩාලින් ?" ඒ ජගත්ය.

"ඉන්නවා අනේ, ඔයාට කොහොමද ? දැන්ද ආවේ ? මටනම් අද හරිම මහන්සියි අප්පා.. ඔ‍ෆිස් එකේ සෑහෙන වැඩ. ඉතින්හ්.. ?"

"එහෙමද පැටියෝ.. අයියෝ ඔයත් හරියට මහන්සි වෙනවා නේද ? අපි ඉතින් තව ටිකක් මෙහෙම ඉවසගෙන යමුකො ඩාලින්.. ඉක්මනටම ඔක්කොම හරි යයි.."

"හ්ම්ම්ම් ඉතින්හ්.. හෙට නිවාඩු නේද ?"

"ඔව්"

"මොනාද කරන්න ඉන්නෙ ?"

"මේ ඔ‍ෆිස් එකේ උන් ඩුබායි යන්න දාගෙන අනේ.. ඉතින් යන්න වෙනවා.. මටනම් ආසත් නෑ.. කාමරේ ඉඳන් ඔයත් එක්ක චැටක් දාගෙන ඉන්නවා තරම් මොනාද නේද ?

"අනේ හොඳයි ගිහින් එන්න.. අපිට ඉතින් කවදා කතා කරන්න බැරිද ? වෙනසකටත් හොඳයිනෙ. කීයටද යන්නෙ ?"

"අද රෑ යනවා පැටියෝ" එවිටම ජගත්ගේ දුරකතනය බෙරිහන් දීමට සැරසුනු නමුත් ඔහුගේ එක ඇඟිලි පහරකින් නිහඬ විය.

"මේ අරුන් කතා කරනවා..."

"එහෙමද.. ආන්සර් කරන්න එපෑයෑ."

"මොන විකාරයක්ද.. ? ඔයත් එක්ක කතා කරණ එක නවත්තලා උන් එක්ක කතා කරන්න.. මොන හෝහපු‍ටුවොද උන් ? "

"හි හි...පවු අනේ.. ඔන්න ආයෙත් රින්ග් වෙනවා.. ගන්න ගන්න මම මෙහෙම ඉන්නම්.." එහෙත් නැවතත් දුරකතනය ජගත්ගේ අනින් නිහඬ විය. මෙවර අණ දිම පෙරට වඩා දැඩි වූ අතර එයට මද වේලාවක්ද ගත විය.

"මල වදේ.." දුරකතනයට එරවූ ජගත් "ඉතින්හ් " යැයි කියමින් සිය පරිගණක තිරය දෙස බැලීය. කුසල් කාමරයට ඇතුලු වීමත් එවිටම වාගේ සිදු විය..

"ආ කුසල් මල්ලී අද වේලාසන ඇවිල්ලානේ.. මම ඒත් බැලුවා මේ මොන පුදුමයක්ද කියලා.." කුසල් දෙස බලමින් පැවසූ ජගත් " බලන්නකො ඩාලින්, මූ අද වේලාසන ඇවිල්ලා.. මෙහෙටනම් ඉතින් වහින්නෑනෙ, අඩුම ගානේ ඔහෙටවත් වහිනවද බලන්න.. පැටියෝ .. හෙහ් හෙහ් " පරිගනකයට කීය. ජගත් බිරිඳ සමඟ කතා කරමින් සිටි බැවින් කුසල් මුවින් නොබැන සිනාවකින් පමනක් සංග්‍රහ කෙළේය.

"පවු අනී නිකන් ඉන්න බයිට් නොකර."

කුසල් නිහඬව පරිගනකයට යොමු වූ අතර ජගත්ගේ ස්කයිප් කතා බහ දිගටම කෙරීගෙන ගියේය..

"එහෙනම් මම තියන්නද වස්තුවෙ.. මම දැන් යන්න ඕනා. අරුන් බලාගෙන ඇති. එහෙනම් හෙට හවසට කතා කරමු හොඳේ ?"

"හරි බබා ඔයා පරිස්සමින් ගිහින් එන්න.. අපි හෙට කතා කරමු.. ලව් යූ"

" ඕකේ ඩාලින්.. ලව් යූ ටූ.. ලව් යූ සෝ මච්. "

"ඉතින් මචන්.. මොනාද කරන්න යන්නෙ අද ? උඹ හෙට වැඩද ?" ජගත් කුසල්ගෙන් ඇසුවේ හෙඩ් ෆෝනය කනෙන් ඉවත් කරමිණි..

"නෑ බන් හෙටත් නිවාඩු.. "

"නෑහ් මාරයිනෙ... ඉතින් මොකද කරන්නෙ ? කොහෙවත් යනවද ? "

"එහෙමට යන්න කියලා තැනක් නෑ බන්.. බොහෝ විට කාමරේම ඉඳියි. උඹ කොහෙවත් යනවද ? "

"ඔව් බන් මම තව ටිකකින් ඩුබායි යනවා හෙට රෑ තමා එන්නෙ"

"එහෙමද ? එළ එළ එහෙනම් ගිහින් වරෙන් මාත් තව ටිකකින් පොඩි වැඩකට එළියට යනවා.. රෑට කන්නත් ඕනා.."

~~නිමි

ලියුවේ:
~~සෙන්නා / 04.09.2014


Monday, May 12, 2014

SL COMICS...| චිත්‍රකතා පිස්සන්ට පමණයි

12.05.2014

උණු උණු තීන්ත සුවඳ එක්ක චිත්‍ර කතාවක් රස විඳින්න තියන ආසාව නිසාම, දැන් පත්තර කඩ වල නැති බව දැන දැනත් මම විඩින් විඩේ ගිහින් ජොලියට වගේ අහනවා "සතුට" තියනවද " සිත්තර" තියනවද "සත්සිරි" තියනවද කියලා. එතකොට පත්තර කඩේ එකා අමුතු හිනාවක් දාලා නෑ කියනවා.

බදාදට නැන්දා අරගෙන එන සතුට පත්තරේ මුලින්ම ගන්න කෙනා වෙන්න අයියයි මමයි සීයලෑ ගෙදර පඩි පෙල බැහැපු කතාව තවම ලියන්නත් තියනවා.  පොඩි කාලේ ඉඳන් ඒ පිස්සුව එහෙමයි.

ඔය ඇම්ම හින්දමයි නිකන් ඉන්න ගමන් ජාලයෙත් චිත්‍ර කතා පත්තර වල නම් ගගහ හොයන්නේ. හැමදාම අසාර්තක වුනාට සාර්තක වෙන දව්සක් එනවලුනේ.. අද එහෙම දවසක්.. ඔන්න හොයා ගත්තු ගමන්  කළේ උඹලත් එක්ක බෙදා ගත්තු එක. මේ සද්කාර්‍යය කරණ එකා කවුද කියලත් මට තාම පැහැදිලි මදි..  දැකපු විදිහට පරණ චිත්‍ර කතා සෑහෙන ගානක් තියනවා.. මට මැජික් වුනාට අනිත් අය සමහර විට දන්නවත් ඇති. දන්න අය නොසළකා හරිණු මැනවී..

තීන්ත සුවඳ නැති වුවද, චිත්‍රකතා කියවීමට මේ ආරාධනය චිත්‍රකතා ලෝලින් උදෙසාමයි..

Sunday, May 4, 2014

ගාර්-ඩි-ලියෝන් දුම්රිය අනතුර | 1988.06.27 || අවසාන කොටස

2014ක්වූ වෙසක් මස 04වනදා


නතුරින් දින තුනකට පසු, කඩාවැදුණු දුම්රිය, විමර්ශකයන්ගේ තීක්ෂණ පරික්ෂාවට හසු විය. ජාතික ප්‍රවාහන පර්යේෂණාගාරයෙහි ප්‍රධානී, දුම්රිය තිරිංග පද්ධති පිළිබඳ විශේෂඥයකු වූ ජෝන් පියර් පැස්කාල් විමර්ශන කණ්ඩායමේ ප්‍රධාන තාක්ෂණික උපදේශකයා විය. පසුගිය වසර හත ඇතුළත ත්‍රස්තවාදී සංවිධාන විසින් ප්‍රංශ දුම්රියන් මත විවිධ අවස්ථාවන්හීදී බෝම්බ පිපිරවීම් සිදුකළ බව පැස්කාල් හොඳින් දැනසිටි කරුණකි. දුම්රියන් මත මනුෂ්‍යය සංහාරයන් සිදුකිරීම උදෙසා ඔවුන් විසින් දැන් විනාශකාරී නව ක්‍රමවේදයක් සොයාගෙනද ? එසේනම් දහස් ගණනක් වූ අහිංසක මගීන්ගේ ජීවිත අනතුරේය.

56 දෙනෙකුට මරු කැඳවමින්, 57දෙනෙකුට තුවාල සිදුකරමින්, සොලෑන්ගේ දුම්රිය ගාර්-ඩි-ලියෝන්හීදී අනතුරට ලක්වීමට බලපෑ හේතුව සොයාගැනීම පැස්කාල්ගේ රාජකාරිය විය. තිරිංග ක්‍රියාත්මක නොවූ බවට පැස්කාල් දැනුවත්වී තිබුණි. ඔහුට අවබෝධකරගත යුතු වූයේ ඒ මන්ද යන්නයි. ඒ සඳහා පැස්කාල් කඩාවැදුණු දුම්රිය අඟලින් අඟල සීරුවට පරික්ෂා කළේය. ඒ ඔස්සේ ඉතා තීරණාත්මක සැකකටයුතු තොරතුරක් සොයාගැනීමට පැස්කාල් සමත් විය. දුම්රියෙහි තිරිංග පද්ධතිය වෙත වායුව සැපයූ ප්‍රධාන තිරිංග කපාටයක් (Break Brake Valve) වසා තිබෙනු පැස්කාල්ගේ නිරීක්ෂණයට හසු විය. තිරිංග නිසි පරිදි ක්‍රියාත්මක වීමටනම් එය විවරව තිබීම අනිවාර්‍යය සාධකයකි. කිසිවකු දුම්රියෙහි තිරිංග පද්ධතියට අතගසා තිබෙන බවට මෙය පැහැදිලි සාක්ෂියකි. මෙම අනතුර හිතාමතා සැලසුම් කරණ ළද කඩාකප්පල්කාරී ක්‍රියාවක ප්‍රතිඵලයක්දැයි දැනගැනීම උදෙසා විමර්ශකයන්හට සෑම වියහැකියාවක් කෙරෙහිම සිය අවධානය යොමු කිරීමට සිදුවී තිබිණි.

දුම්රියෙහි තිරිංග බලගැන්වූයේ එන්ජින් මැදිරියෙහි උත්පාදනය කරණ ලද සම්පීඩිත වායුවෙනි. එය නළයක් ආධාරයෙන් දුම්රියෙහි මුළු දිගම ආවරණය වෙන පරිදි ‍රැගෙන යන ලදී. සෑම මැදිරියකම, මෙම නළයෙන් වායුව ලබාගෙන ක්‍රියාත්මක වෙන වෙනම තිරිංග ඒකකයක් විය. එන්ජින් මැදිරියෙහි පි‍ටුපස මෙම නලයෙහි ගමන් කරනා වායුව පාලනය කළ හැකි කපාටයක් පිහිටා තිබිණි. සොලෑන්ගේ දුම්රියෙහි වසා තිබුණේ මෙම කපාටයයි. එමගින් එම ස්ථානයෙන් පි‍ටුපසට වායුව ගමන් කිරීම අවහිර කොට තිබිණි. විමර්ශකයනට අනුව මේ සඳහා තිබිය හැක්කේ එකම නිගමනයයි. යම්කිසිවකු විසින් කපාටය වසා ඇත. පැස්කාල් විශ්වාස කරනා අන්දමට, කඩාකප්පල්කාරී ක්‍රියාවක් උදෙසා මෙය සිදු කළේනම්, සිදු කළ තැනැත්තා සතුව දුම්රිය තිරිංග පද්ධති පිළිබඳව විශේෂඥ දැනුමක් තිබිය යුතුය. හෝඬුවාවක් ලබා ගැනීමේ අරමුණින් පැස්කාල් විසින් රියදුරු සොලෑන් හා සහයකයා ජෝන් බෝවී ප්‍රශ්න කිරීමට භාජනය කරණ ලදී.

සොලෑන්ට අනුව ගමනෙහි මුල් විනාඩි 58 ඇතුළත දුම්රියෙහි තිරිංග නිසි පරිදි ක්‍රියාත්මක වී තිබුණි. එසේනම්, මෙම කපාටය වැසීමේ ක්‍රියාවලිය සිදුවී ඇත්තේ වෙයර්-ඩි-මෙසෝන්ස් හී ඇතිවූ හදිසි නතර කිරීමෙන් පසුව විය යුතුය. අදාළ කාන්තාව විසින් වෙයර්-ඩි-මෙසෝන්ස් හිදී හදිසි දම්වැල ඇද, දුම්රිය නතර කරවනු ලැබුයේ මන්ද යන්න කිසිවෙකුට පැහැදිලි කළ නොහැකි විය. තවද, ඇය, බෝවී එම මැදිරිය වෙත පැමිණීමට පෙර දුම්රියෙන් ඉවත්ව නොපෙනී ගොස් සිටි බැවින් බෝවී හට ඇයව ප්‍රශ්න කළ නොහැකි විය. මෙම කාන්තාව මෙම කපාටය වැසීමේ ක්‍රියාවලිය හා සම්බන්ධයක් ඇති තැනත්තියක් විය හැකිද ? දම්වැල ඇදි කාන්තාවට ඉදිරිපත් වන ලෙස මාධ්‍ය ඔස්සේ සිදු කළ ඉල්ලීමට ප්‍රතිචාර දක්වමින් 21 හැවිරිදි එක දරු මවක් වූ ඕඩීර් මිර්වා විමර්ශකයන් හමුවට පැමිණියාය.

මීර්වාට අනුව, ඇය විසින් මෙම දුම්රියෙන් වෙයර්-ඩි-මෙසෝන්ස් වෙත පැමිණීම දෛනික ක්‍රියාවලියකි. ඒ වෙයර්-ඩි-මෙසෝන්ස් වෙත පාසල් යන සිය දරුවාව පාසලින් ‍රැගෙන යාම සඳහාය. එහෙත්, ගිම්හාන කාලසටහනෙහි සිදුවූ වෙනස ඇය විසින් නොදැන සිටියාය. දුම්රිය වෙයර්-ඩි-මෙසෝන්ස් හී නොනවත්වා ඉදිරියට ඇදෙනු දැක කලබල වූ ඇය විසින් හදිසි දම්වැල ඇද දුම්රියෙන් බැස ගියේ වේලාවට පාසලෙහි සිටිය යුතු බැවිනි. පැස්කාල්ට අනුව ඇයගේ ක්‍රියාව වගකීම රහිත එකක් නමුදු සැකකටයුතු නොවේ.

කාන්තාව දුම්රියෙන් බැසගිය පසු සිදුවූ සිද්ධිය දැනගැනීම සඳහා පැස්කාල් විසින් ජෝන් බෝවීව ප්‍රශ්න කිරීමට ලක් කළේය.

දුම්රිය නතරවීමෙන් පසු බෝවී විසින් හදිසි තිරිංග පද්ධතිය නැවත සැකසීමේ කාර්යයට යොමුවී ඈත. ඒ සඳහා භාවිතා කළ යුතු අල්ලුව පිහිටා තිබුණේ ප්‍රථම හා දෙවන මැදිරි ද්විත්වය අතරය. එම අල්ලුව පෙර සඳහන් තිරිංග කපාටයට ඉතා ආසන්නව පිහිටා තිබුණි. බෝවී පවසන පරිදි අල්ලුව ඉතා තදින් සිරවී තිබූ බැවින් ඔහුට එය සෙලවීමටවත් නොහැකි වී ඇත. ඒ සඳහා කළ ව්‍යායාමයන් නිෂ්ඵල වී ඇත. ඉන්පසුව එතනට පැමිණි රියදුරු සොලෑන් විසින්ද ඒ සඳහා උත්සහ කර ඇති අතර සැලකිය යුතු වේලාවක් ඒ සමඟ වෙහෙසීමෙන් අනතුරුව සොලෑන් විසින් අල්ලුව නියමිත පරිදි පිහි‍ටුවීමට සමත්වී ඇත.

නමුත්, සොලෑන් නැවතත් නියමු කුටියට පිවිසි විට ඔහුව මවිත කරවමින් තිරිංග තවමත් සිරවී තිබෙන බැව් නිරීක්ෂණය කරනා ලදී. හදිසි තිරිංග පද්ධතිය යළි සැකසූ පසුවත් දුම්රියෙහි තිරිංග තවමත් සිරවූ තත්ත්වයේ පසු වන්නෙ මන්ද ? එය පැස්කාල්වද ගැටලුවකට මැදි කළේය. දුම්රියෙහි තිරිංග ක්‍රමවේදය පිළිබඳව හොඳින් නිරීක්ෂණය කළ පැස්කාල් හට අවබෝධවූයේ හිරවූ හදිසි තිරිංග පද්ධතිය යථා තත්ත්වයට පත් කළද, සම්පීඩිත වායු නළයේ කපාටය වසා දමා ඇත්නම් දුම්රියෙහි තිරිංග තවමත් හිරවූ තත්ත්වයේ පවතින බවයි. එය තිරිංග සඳහා නිසි සම්පීඩිත වායු සැපයුමකින් තොරව දුම්රිය ගමන් ආරම්භ කිරීම වැළක්වීමට පිහි‍ටුවා තිබූ ආරක්ෂිත ක්‍රමවේදයකි. මෙහිදී පැස්කාල්ගේ සැකය වෙනත් දිශාවක් කෙරෙහි එල්ල විය.

සොලෑන් සමඟ සිදු කළ සාකච්ඡාවෙන් අනතුරුව කපාටය වැසුණේ කෙසේද යන්න හෙළිකර ගැනීමට පැස්කාල් ඇතුළු කණ්ඩායමට හැකිවූහ.

"අපි ඔහුව ප්‍රශ්න කළ අවස්ථාවේ සොලෑන් පිළිගත්තා හදිසි තිරිංග අල්ලුව නැවත යථාතත්වයට ගැනීමේදී ඔහු විසින් අදාළ කපාටයෙහි ලිවරය ඇල්ලු බවත්, වැඩි බලයක් යෙදවීම සඳහා එම ලිවරයට බර යෙදීමක් කළ බවත්." - පැස්කාල්

සොලෑන්ගේ ප්‍රකාශය පැස්කාල්ගේ සැකය තහවුරු කළේය. සොලෑන් විසින් හදිසි තිරිංග අල්ලුව යථා තත්ත්වයට ගැනීමේදී අනවධානයෙන් සම්පීඩීත වායු නළයේ කපාට ලිවරය මත බර යෙදීමෙන් ඔහුත් නොදැනුවත්වම එය වැසි ගොස් ඇති බව ස්ථීරය. එම අවස්ථාවේ සොලෑන්ගේ අරමුණ හදිසි තිරිංග අල්ලුව කෙරෙහිම යොමුව තිබූ බැවින්, තමා අතින් නොදැනුවත්ව සිදුවූ වරද ඔහුගේ අවධානයට ලක් නොවීය. 

සොලෑන් SNCF ආයතනයේ උපදෙස් නිසි පරිදි පිළිපැද්දේනම් තවමත් අනතුර වළක්වා ගැනීම අවස්ථාව ඔහු සමඟයි. තමන් නිසි පරිදි හදිසි තිරිංග පද්ධතිය යථා තත්ත්වයට පත් කළේයැයි සොලෑන් විශ්වාස කළේය. නමුත් සම්පීඩිත වායු නළයේ කපාටය වසා දැමීමෙන් ඔහු විසින් දුම්රියෙහි අනෙක් මැදිරි හතෙහිම තිරිංග සඳහා සම්පීඩිත වායු සැපයුම කපාහැර තිබිණ. එබැවින්, ප්‍රථම මැදිරියෙහි හැර අනෙක් මැදිරි හතෙහිම තිරිංග මේ මොහොත වන විටත් හිරවී තිබුණි. එහෙත්, එසේනම් සොලෑන් විසින් දුම්රිය නැවතත් ධාවනය කරවීමට සමත් වූයේ කෙසේද ? ඒ සඳහා ඇති එකම ක්‍රමයනම් සෑම මැදිරියකම ඇති තිරිංග වෙත සපයා තිබූ සම්පීඩිත වායුව නිදහස් කොට තිරිංග ලිහිල් කර ගැනීමයි. SNCF ක්‍රියාපටිපාටීන්ට අනුව මෙවන් අවස්ථාවකදී සොලෑන් විසින් ඉන්ජිනේරුවන්ගේ සහය ඉල්ලා සිටිය යුතුව තිබුණි. එසේ වූයේනම් සිදුවී ඇති වරද ඔවුන් විසින් එක් වරම හඳුනා ගැනීමට ඉඩ තිබිණ. එහෙත්, පිටත් වීමට හදිසියෙන් සිටි සොලෑන් විසින් ඒ වෙනුවට තමන් විසින්ම සිරවූ තිරිංග ලිහිල් කර ගැනීමට තීරණය කරණ ලදී. සොලෑන් නොදැන සිටි කරුණනම් සම්පීඩිත වායු නළය වසා දැමීම නිසා මෙම සිරවීම සිදුවී ඇති බවයි. ඒ වෙනුවට ඔහු විසින් උපකල්පනය කෙරුවේ මෙය හදිසි තිරිංග භාවිතා කළ සමහර විටෙක සිදුවෙන වායු සිරවීමක් නිසා ඇතිවූ තත්ත්වයක් බවයි. එවැනි විටෙක මෙසේ වායුව නිදහස් කර හැරීම මගින් තිරිංග ලිහිල් කර ගැනීම සාමාන්‍ය ක්‍රමවේදයයි. සොලෑන් විසින් බෝවීගෙද සහය ඇතිව මැදිරි හතෙහිම තිරිංග එකින් එක ලිහිල් කර ගැනුණේ පද්ධතියේ ඉතිරිව තිබූ සුළු සම්පීඩිත වායු ස්වල්පයද පිටතට මුදා හැර දමමිනි. දැන්, සොලෑන්ගේ දුම්රිය යනු නිසි වේගයට පැමිණි පසු මිනිස් පාලනයෙන් බැහැර වන විනාශකාරී යන්ත්‍රයකි.

අවසානයේදී දුම්රිය පිටත් විය. නියමිත වේලාවට ගමනාන්තය වෙත ළඟාවීම සඳහා සොලෑන් විසින් පැයට සැතපුම් 70කට ආසන්න වේගයක් දක්වා දුම්රියෙහි වේගය වැඩි කළේය. නියමිත තිරිංග බලයෙන් අටෙන් එකකින් පමණක් යුක්තව, දුම්රිය සිය ඛේදනීය අවසානය කරා ඇදෙමින් තිබුණි.

තවමත් මෙම විනාශය නතර කර ගැනීමේ අවස්ථාව සම්පූර්ණයෙන් ගිලිහී නොමැත. කාලසටහනට අනුව ගාර්-ඩි-ලියෝන් සිට සැතපුම් දෙකහාමාරක් මෙපිටින් තවත් නැවතුමක් වූ මෙයිසාන් අල්ෆෝර්ට් නියමිතව තිබුණි. එහි දුම්රිය නතර කිරීමට ගන්නා උත්සහයේදී දුම්රියෙහි තිරිංග නොමැති බව හෙළිවන අතර ගාර්-ඩි-ලියෝන් වෙත ළඟාවීමට පෙර වේගය තුනීවීමෙන් සිදුවන ස්වභාවික නැවතීමකින්ම දුම්රිය නතර කරගත හැකිව තිබුණි. එම රාත්‍රියේදී ගාර්-ඩි-ලියෝන් හී කාර්‍යය භාර නිලධාරියාවූ ඔන්ඩ්‍රේ ටෝලන්ස්ව ප්‍රශ්න කිරීමෙන් පසු, දුම්රිය ප්‍රමාද වී තිබූ බැවින් ඔහු විසින් දුම්රිය මෙයිසාන් අල්ෆෝර්ට් හී නතර නොකිරීමට උපදෙස් දුන් බව හෙළිකර ගැනීමට පැස්කාල් සමත් විය. විනාශය වළක්වා ගැනීමට තිබූ තවත් අවස්ථාවක් මෙසේ මගහැරී ගියේය.

අනතුර මගහරවා ගැනීමට වූ අවස්ථා තවමත් අවසන් නැත. දුම්රියෙහි අතිරේක විද්‍යුත් තිරිංග පද්ධතියක් පවතින බව දුම්රිය තිරිංග විශේෂඥයෙකු වූ පැස්කාල්ට රහසක් නොවීය. එම අතිරේක තිරිංග පද්ධතිය සැලසුම් කොට තිබුණේ ධාවනයේ පවතින දුම්රියක වේගය අඩාල කරගත හැකි අයුරිනි. නියමු කුටියේම සිට භාවිතා කළ හැකිව තිබූ විද්‍යුත් තිරිංගය වෙනුවට සොලෑන් විසින් බෝවී අමතා කිසියම් මැදිරියක වූ යාන්ත්‍රික තිරිංග පද්ධතිය සොයා එය භාවිතා කරණ ලෙස උපදෙස් දුන්නේය. පැස්කාල්ට අනුව එම යාන්ත්‍රික තිරිංගය භාවිතා කළද, වේගයෙන් ගමන් කරනා දුම්රියකට එයින් කළ හැකිවූ බලපෑමක් නැත. එය සැලසුම් කර තිබුණේ දුම්රිය ස්ථානයක ඇති දුම්රියයක් පාලනය කිරීම වැනි කටයුත්තක් සඳහා පමණකි. එ වෙනුවට විද්‍යුත් තිරිංගය, ඉතිරිව තිබූ සම්පිඩිත වායු තිරිංගය හා භාවිත කළේනම් අඩුම තරමින් විනාශය අවම කර ගැනීමටවත් හැකියාවක් ලැබෙන බව පැස්කාල්ගේ විශ්වාසයයි. එසේනම් දුම්රිය නතර කරගැනීම උදෙසා සොලෑන් විසින් එය භාවිතා නොකළේ මන්ද ?

පැස්කාල්ගේ විමර්ශනයන්ට අනුව, දුම්රිය රියදුරන් විද්‍යුත් තිරිංග භාවිතා කිරීමට මැලිකමක් දක්වයි. සම්පීඩිත වායු තිරිංග හා විද්‍යුත් තිරිංග ඒකාබද්ධව භාවිතා කරනා බොහෝ විට තිරිංග සිරවීම, රෝද අගුළු වැටීම වැනි දුෂ්කරතාවයනට මුහුණ දීමට සිදුවේ. එබැවින් දුම්රිය රියදුරන් පුරුද්දක් ලෙස හැකි සෑම විටම විද්‍යුත් තිරිංග භාවිතයෙන් වළකී. සොලෑන් හට විද්‍යුත් තිරිංග භාවිතා කිරීමේ පුරුද්දක් තිබුණද, තදින්ම කලබලවූ ඒ අවස්ථාවේ, දුම්රියෙහි තවත් අතිරේක තිරිංග පද්ධතියක් තිබෙනවා යන්න පවා සම්පූර්ණයෙන්ම අමතක වී ඇත. එමගින් දුම්රිය නවතා ගැනීමට සොලෑන් හට ලැබුණු අවසාන අවස්ථාවද ඔහු විසින් මගහරවාගෙන තිබුණි.

නමුත්, දුම්රිය ඝට්ටනය මගහරවා ගැනීමට තවත් අවස්ථා ඉතිරිව තිබුණි. පාලනයකින් තොරව ගමන්ගන්නා දුම්රියයන් සඳහා අනුගමනය කරනු ලබනා පිළිගත් ක්‍රමවේදයක් විය. එනම් අදාළ දුම්රිය හඳුනාගෙන එය අවම විනාශයක් ගෙනදිය හැකි හිස් පථයක් වෙතට යොමුකිරීමයි.

ඝට්ටනයට විනාඩි එකහමාරක් පමණ තිබියදී පාලන ඒකකය ඇමතු සොලෑන්, සිය දුම්රියෙහි තිරිංග නොමැති බවත් වහාම සියලුම දුම්රියයන් නතර කරවන ලෙසත් ඉල්ලා සිටියේය. එහෙත් මෙහිදී නැවතත් සොලෑන් විසින් පිළිගත් ක්‍රියාපටිපාටිය උල්ලංඝනය කොට තිබුණි. සෑම පණිවිඩයකදීම රියදුරා විසින් සිය නම හා ස්ථානය ඉදිරිපත් කිරීම SNCF පිළිගත් ක්‍රමවේදයයි. නමුත් අධිකව කලබල වී සිටි සොලෑන් හට මෙම නීතිය අමතක විය. එබැවින්ම පාලක මැදිරියෙහි වූ ඔන්ඩ්‍රේ ටෝලන්ස් හට ඇමතුම ලැබුණේ කිනම් දුම්රියෙන්දැයි යන්න අවබෝධ කොටගත නොහැකි විය. අධිකව කලබල වී සිටි සොලෑන්ගේ කට හඬ පවා හඳුනා ගැනීමට දුෂ්කර වූ බව ටෝලන්ස් පවසයි. තිරිංග නොමැති දුම්රිය හඳුනාගත හැකිවූයේනම් ඔහුට එය හිස් පථයක් වෙත යොමුකරවීමට හැකියාවක් තිබුණි. ටෝලන්ස් විසින් ඇමතුම ලද දුම්රිය නැවත ඇමතීමට ගත් උත්සහය ව්‍යර්ථ වූයේ එමගින් ප්‍රතිචාරයක් නොවූ බැවිනි. සොලෑන් ඒ වනවිටත් නියමු කුටිය හැරගොස් අවසන්ය.

තිරිංග නොමැති දුම්රිය ඒ මොහොතේ ගාර්-ඩි-ලියෝන් වෙත නියමිතව තිබූ දුම්රිය හතරෙන් එකක් විය යුතු බව දුම්රිය ගමන් පාලකයනට අවබෝධ විය. අනෙක් දුම්රියන් ත්‍රිත්වය හඳුනා ගතහොත් තිරිංග නොමැති දුම්රිය හඳුනාගත හැකි බව ඔවුන්ට අවබෝධ විය. නමුත් සොලෑන් විසින් නියමු කුටිය හැරයාමට ප්‍රථම අනතුරු හැඟවීමේ සංඥාව භාවිත කළ බැවින් ජාලයෙහි වූ සියලුම දුම්රියයන් වෙත එය සම්ප්‍රේෂණය විය. ටෝලන්ස්ට අනුව, සියලුම රියදුරන් සිදු වූයේ කුමක්දැයි දැනගැනීම සඳහා පාලක මැදිරිය වෙත එකවර කතා කිරීම හේතුකොටගෙන තමන්ට, අදාළ දුම්රිය හඳුනා ගැනීම නියමිත කාලයට ප්‍රථම සිදු කළ නොහැකි වූ බවයි.

මේ සියලු අවස්ථා මගහැරීගියද තවත් එකම එක අවස්ථාවක් ඝට්ටනය වැළකීම උදෙසා ඉතිරිව තිබිණ. ගාර්-ඩි-ලියෝන්හී දුම්රියයන් යොමු කිරීමේ ක්‍රියාවලිය සංඥා කරුවනට කලින් සැලසුම්කොට ස්ව්‍යංක්‍රීයව ක්‍රියාත්මකවීමට සකසා තැබිය හැකි ක්‍රමයකි. ඒ අනුව 2S පථයෙහි ගමන් කළ සොලෑන්ගේ දුම්රිය ටොන්ගීගේ දුම්රිය නවතා තිබූ වේදිකා අංක දෙක වෙත යොමුව තිබුණද, දුම්රියපළට යාර 560කට මෙපිටින් වූ යොමුකිරීම් සන්ධියෙන් දුම්රිය කලින් සංඥා කරුවන් සපයා තිබූ තොරතුරු වලට අනුව ස්ව්‍යංක්‍රීයවම වේදිකා අංක එක වෙත යොමු වීමට නියමිතව තිබුණි. එසේ වූයේනම් ජීවිත හානි කිසිත් නොමැතිව ඝට්ටනය කෙළවර වීමට බොහෝ ඉඩ තිබූ බවට පැස්කාල් විශ්වාසය පළ කරයි. එසේනම් කලින් සිදුකොට තිබූ සැලසුමට අනුව දුම්රිය වේදිකා අංක එක වෙත යොමු නොවුනේ මන්ද ? සංඥාකරුවනට නියමිත සැලසුම් සැකසීමට අමතකව ගොස්ද ? පැස්කාල්ගේ සොයාගැනීම වලට අනුව සංඥා කරුවන් සිය රාජකාරිය අකුරටම ඉ‍ටුකොට තිබුණි. එසේනම්, වැරදුණේ කොතනද ?

අනතුරු හැඟවීමේ සංඥාවක් ලද සැණින් සංඥා කරුවන් විසින් General Closure Procedure නමින් හැඳින්වූ පටිපාටිය වහා ක්‍රියාත්මක කළ යුතුය . ඒ අනුව සියලුම කොළ සංඥා රතු බවට හැරවෙන අතර මුලු ජාලයම වහා අක්‍රීය තත්ත්වයකට පත්වේ. නමුත් එම ක්‍රියාපටිපටියෙහි සංඥා කරුවන් නොදැන සිටි ප්‍රතිවිපාකයක්ද තිබුණි.

දුම්රියයන් වෙනත් පථයක් වෙත යොමුකිරීමේ පාලනය සංඥාකරුවන් අතට පත්කිරීම උදෙසා, කලින් සකසා තිබූ ස්ව්‍යංක්‍රීය යොමුකිරීම් සියල්ල, වසාදැමීමේ ක්‍රියාපටිපාටිය අනුගමනය කළ සැණින් මැකී යන ලෙස සැකසී තිබුණී. ඒ වනවිට යොමු කිරීමේ තුඩු පවතින අවස්ථාවෙහිම, එනම් වේදිකා අංක දෙක වෙතට යොමුව අගුළු වැටී තිබුණි. එබැවින් සොලෑන්ගෙ දුම්රිය තව දුරටත් ස්ව්‍යංක්‍රීයව හිස් පථයක් වෙත යොමුවීමක් සිදු නොවේ. දැන්, අනතුර මගහැරගැනීමට ඉතිරිව තිබූ සියලු අවස්ථා මගහැරී ගොස් අවසන්ය. ඝට්ටනය තවදුරටත් නවතාලිය නොහේ.

ඔන්ඩ්‍රේ ටොන්ගීගේ පරාර්ථකාමී කැපකිරීම නොවන්නට තවත් විශාල පිරිසක් මියයා හැකිව තිබුණ බව පැස්කාල් ඇතුලු පිරිසගේ විශ්වාසයයි. තමන් කළ මෙහෙවර අගයමින්, ඔන්ඩ්‍රේ ටොන්ගී, ගාර්-ඩි-ලියෝන් ඛේදවාචකයෙහි වීරයෙකු ලෙසින් පිදුම් ලැබීය.

විමර්ශකයනට අනුව ව්‍යසනයේ ප්‍රධාන හේතුව රියදුරාගේ වරදයි. එයට අමතරව දුම්රිය ජාලයෙහි වූ තාක්ෂණික හා ආරක්ෂක ක්‍රමවේදයන්ගේ අඩුපාඩු කිහිපයක්ද ඔවුන්ගේ පරීක්ෂණ මගින් හඳුනා ගන්නා ලදී. තිරිංග සම්පීඩිත වායු නළයෙහි කපාටය, ලෙහෙසියෙන් ළඟා විය හැකි ස්ථානයක පිහිටා ඇති බව ඔවුන් විසින් පෙන්වා දෙන ලදී. පණිවිඩ හුවමාරු ක්‍රමය සංකීර්ණ නොවිය යුතු අතර රියදුරන් ඒ සඳහා මනා පුහුණුවක් ලබා සිටිය යුතු බවත් ඔවුන්ගේ නිර්දේශ අතර වූහ. සංඥාකරුවනට කලින් සැකසූ දුම්රිය යොමුකිරීමේ උපදෙස් මැකී නොයන ලෙස සංඥා පද්ධතිය වසා දැමීමේ හැකියාව පැවතිය යුතු බවද පැස්කාල් ඇතුළු කණ්ඩායමේ නිර්දේශයක් විය.

ඩැනියෙල් සොලෑන් හා සහයකයා වූ ජෝන් බෝවී හය මසක සිර දඬුවමකින් පසු නිදහස ලැබීය. ගාර්-ඩි-ලියෝන් කාර්‍යභාර නිලධාරියා වූ ඔන්ඩ්‍රේ ටෝලන්ස් හා දම්වැල අදින ලැබූ ඕඩීර් මිර්වා හට අපරාධ චෝදනා එල්ල වුවද අධිකරණය හමුවේ ඔවුන් නිවැරදිකරුවන් ලෙස තීරණය වූහ.

අනතුරින් පසුව SNCF විසින් සිදුවූ වැරදි නැවත සිදු නොවීමට අවැසි පියවරයන් වහාම ගනු ලැබීය. ඔවුන් විසින් නව ආරක්ෂණ විධි විධාන රාශියක්ම හඳුන්වා දුන් අතර රියදුරු පුහුණුවද නව නිවැරදිකිරීම් සහිතව යාවත්කාලීන කරණ ලදී. සම්පීඩක වායු තිරිංග කපාටය පහසුවෙන් ළඟා නොවිය හැකි ලෙස ස්ථාන ගත කරණ ලද අතර පණිවුඩ හුවමාරු ක්‍රමවේදයද දියුණු තත්ත්වයකට පමුණුවන ලදී. මෙම සාධනීය ප්‍රතිචාරයන්ගේ ප්‍රතිඵලයක් ලෙස අද වන විට යුරෝපයේ ආරක්ෂිතම හා තාක්ෂණික වශයෙන් උසස්ම දුම්රිය සේවයක්  ප්‍රංශය සතුව පවතී. 

--නිමි--


Seconds From Disaster S02E11 - Runaway Train  ඇසුරින් සකස් කෙරුවේ;


~~සෙන්නා / 04.05.2014

වෙනත් මූලාශ්‍ර;
1. http://secondsfromdisaster.net/s02e11-paris-train-crash-gare-de-lyon-rail-accident/
2. http://en.wikipedia.org/wiki/Gare_de_Lyon_rail_accident

Wednesday, April 30, 2014

ගාර්-ඩි-ලියෝන් දුම්රිය අනතුර | 1988.06.27

2014ක්වූ බක් මස 30 වනදා

සිදුවීමට නියමිත යමක් වැළැක්විය නොහැක යන්න සනාථ කරනා හොඳම නිදර්ශනයකි මේ. සිද්ධිය සිදුවීමට අවැසි සාධක එනම් දම්වැල ඇදීම, රියදුරාගේ නොදැනුවත්කම, සහයකයෙකුගේ පමාව, නැවතුම්පළක් මගහැරීමට දෙන උපදෙස, අනතුරු හැඟවීමේ සංඥාව, නියමු කුටිය අතහැරයාම එකින් එක පෙළගැසෙමින් අනතුර කරා යන ගමන විශ්මයජනකය. වැඩි විස්තර අවැසිද ? ගොඩ වන්න ගාර්-ඩි-ලියෝන් බලා ඇදෙනා ඩැනියල් සොලෑන්ගේ දුම්රියට. 


+++++

1988 ජුනි 27 වෙනිදා සවස පැරිසියේ ගාර්-ඩි-ලියෝන් (Gare de Lyon) දුම්රිය පළ බලා ඇදෙනා මගී දුම්රියකි. ප්‍රංශයේ රාජ්‍ය දුම්රිය සේවය වන SNCF සතුවු, අංක 153944 දරණ මෙම දුම්රිය එදින සිය සුපුරුදු නැවතුම් පලක් වූ වෙයර්-ඩි-මෙසොන්ස් ( Vert de Maisones ) දුම්රියපළෙහි නතර නොවී ඉදිරියටම ඇදුණේ SNCF බලධාරීන් විසින් ගිම්හාන කාලසටහන යටතේ එම දුම්රියපළ සේවයෙන් ඉවත් කොට තිබූ බැවිනි. එහෙත් ! හදිසියේම නොසිදුවිය යුතු, කලාතුරකින් සිදුවන අමුත්තක් සිදුවිය. දුම්රියේ හදිසි තිරිංග පද්ධතිය ක්‍රියාත්මක වූ බව අගවන නළා හඬ ඇසෙනා විටම වාගේ, ස්ව්‍යංක්‍රීයව නතර වූ දුම්රියෙන් බැස, දිව ගොස් නොපෙනී ගිය කාන්තාවක් දුම්රියෙහි රියදුරු ඩැනියෙල් සොලෑන් හා ඔහුගේ සහයකයා වූ ජෝන් බෝවී විසින් නිරික්ෂණය කරනා ලදී. ස්ව්‍යංක්‍රීයව හිරවූ තිරිංග පද්ධතිය නැවත යථා තත්ත්වයට පත් කිරීම විනාඩි කිහිපයක කාර්‍යයක් වුවද සොලෑන් විසින් සියල්ලට පළමුව ගාර්-ඩි-ලියෝන්හී පාලක මැදිරිය අමතා සිද්ධිය වාර්තාකර සිටියේය. සොලෑන් සහ බෝවී තිරිංග පද්ධතිය යථා තත්ත්වයට ගැනීමට වෙහෙසෙනා අතරතුර, දුම්රියෙහි පමාවක් අපේක්ෂාකළ සමහර මගීන් සිය ගමනාත්තයට ළඟාවීම සඳහා වෙනත් විකල්පයන් සොයා දුම්රියෙන් බැස ගිය අතර අනෙක් මගීන් සිය ගමනාන්තයට මෙම දුම්රියෙන්ම ළඟා වීම උදෙසා නොඉවසිල්ලෙන් යුතුව ‍රැඳී සිටියහ.

ඔවුන්ගේ ගමනාන්තය වූ ගාර්-ඩි-ලියෝන් දුම්රියපළ, රටෙහි දකුණු සහ නැගෙනහිර ප්‍රදේශයන් ආවරණය වන දුම්රිය සේවයේ ප්‍රධානතම දුම්රියපළකි. ප්‍රංශයෙහි කාර්‍යය බහුලම දුම්රියපළ වලින් එකකි. නගර අභ්‍යන්තරයෙහි හා නගරාන්තරව ධාවනයෙහි යෙදුණු දුම්රියන් ගාර්-ඩි-ලියෝන් වෙතින් සේවා පහසුකම් ලැබූහ. දුම්රියපළ වෙත පිවිසෙන හා පිටවෙන සෑම දුම්රියක් පිළිබඳවම නිරීක්ෂණය කිරීම, ගමන් වාර පාලනය කිරීම මධ්‍යම පාලක මැදිරියෙන් සිදු විය. අදාළ දින රාත්‍රියෙහි එහි සේවයේ නියුතුව සිටි කාර්‍යය භාර නිලධාරියා වුයේ ඔන්ඩ්‍රේ ටෝලන්ස්ය. එම රාත්‍රියේදී, 360කට අධිකවූ දුම්රිය ගමන්වාර සංඛ්‍යාවක් සුමටව හා ආරක්ෂාකාරීව මෙහෙයවීමේ වගකීම ඔහු අතේ ‍රැඳී තිබුණි. එයට අමතරව එකල්හී ප්‍රංශය මුහුණ දෙමින් සිටි ත්‍රස්ත තර්ජනයන්, දුම්රියයන් හා ඒවායෙහි මගීන් වෙත සිදු කළ හැකි විනාශකාරී ක්‍රියාවන් පිළිබඳව අවධියෙන් සිටීමද ඔහුගේ රාජකාරියෙහිම තවත් කොටසකි.

එක් දරු මවක්වූ කොලෙට් පකලේ සිය රාජකාරියෙන් පසු නිවස බලා යාමට දුම්රිය අල්ලා ගැනිම සඳහා සුහුසුළු වූවාය. සැමියාගෙන් වෙන්ව, දහතුන් හැවිරිදි දරුවා සමඟ විසූ ඇය රාජකාරිය නිමවූ සැණින් නිවස බලා යාමට උත්සුක වන්නේ තනියම නිවසේ සිටින දරුවා උදෙසාමය. සෝලෑන් සහ බෝවී තිරිංග පද්ධතිය යථා තත්ත්වයට ගැනිමට වෙහෙසෙනා එම මොහොතේම, කොලෙට් විසින් ගාර්-ඩි-ලියෝන් දුම්රියපළ බලා හනික දුවමින් සිටියාය. එම මොහොතේම ලූවර් කලාගාරයෙහි සේවය කළ හතළිස් හැවිරිදි ඩොමිනික් පාවීද ගාර්-ඩි-ලියෝන් වෙත දුවමින් සිටියේ සිය සුපුරුදු දුම්රිය අල්ලා ගන්නා අටියෙනි. ඔවුන් දෙදෙනා පමණක් නොව තවත් දහස් ගණනකගේ එම මොහොතේ අරමුණ වූයේ ගාර්-ඩි-ලියෝන් පමණකි.

පස්වරු හත පමණවන විට සොලෑන් සහ බෝවී දුම්රියෙහි තිරිංග පද්ධතිය යාථා තත්ත්වයට පත්කරගැනීමට සමත් වූහ. නමුත් ඒ සඳහා ඔවුනට බලාපොරොත්තු වූවාට වඩා කාලයක් ගතවූ අතර ඒ වනවිටත් දුම්රිය විනාඩි විස්සකින් පමණ ප්‍රමාදවී තිබුණි. ගමන නැවත ආරම්භයට පේර සොලෑන් විසින් ඔන්ඩ්‍රේ ටෝලන්ස් අමතා තත්ත්වය වාර්තා කර සිටි විට ප්‍රමාදය වළක්වා ගනිමින් නියමිත වේලාවට ගාර්-ඩි-ලියෝන් වෙත ළඟා වීම සඳහා ඊළඟ නැවතුම වූ මෙයිසාන් අල්ෆෝර්ට් මග හරින ලෙස ටෝලන්ස් විසින් සොලෑන්ස් හට දන්වා සිටියේය.

මේ අතර ගාර්-ඩි-ලියෝන් වෙතින් පිටත් වීමට සූදානම්ව තිබූ තවත් මගී දුම්රියකි. කොලෙට් සහ පාවී යන දෙදෙනාගේම ඉලක්කය වූයේ මෙම දුම්රිය අල්ලා ගැනීමයි. එදින සහයකයාගේ වූ ප්‍රමාදයක් නිසා අදාළ දුම්රියට, කාලසටහනට අනුව පිටත් වීමට නොහැකි විය. රියදුරු ඔන්ඩ්‍රේ ටොන්ගී සහ දහස් ගණනක් වූ මගීන් සහයකයාගේ පැමිණීම වෙනුවෙන් ගාර්-ඩි-ලියෝන්හී නොඉවසිල්ලෙන් පසු වූහ. සොලෑන්ගේ දුම්රිය නැවැත්වීමට සැලසුම් කර තිබුණේ ඔන්ඩ්‍රේ ටොන්ගීගේ දුම්රිය නවතා තිබූ වේදීකාවේම බැවින්, සොලෑන්ගේ පැමිණීමට ප්‍රථම ඔන්ඩ්‍රේ ටොන්ගී සිය දුම්රිය සමඟ පිටත්වීම අවැසි වී තිබුණි. එහෙත් එය අත්‍යාවශ්‍ය කාරණයක් නොවුනේ යම් ප්‍රමාදයක් සිදුවුවහොත් සංඥා කරුවන් හට සොලෑන්ගේ දුම්රිය වෙනත් වේදිකාවකට යොමු කිරීමට පියවර ගත හැකි බැවිනි. එය ස්ව්යංක්‍රීයව සිදු වීමට, කලින් සැලසුම් කොට තිබූ ක්‍රියාවලියකි.

වේලාව සවස 07:07 වන විට සොලෑන්ගේ දුම්රිය පැයට සැතපුම් 16කට වඩා අධික වේගයකින් ගාර්-ඩි-ලියෝන් බලා ඇදෙමින් තිබුණි. ගාර්-ඩි-ලියෝන් ආසන්න වන විට කහ පැහැති සංඥා එළි විසින් සිය දුම්රියෙහි වේගය අඩු කරගන්නා ලෙස සොලෑන් හට සිහි කැඳවූහ. එයට අවනතව තිරිංග ලිවරය ක්‍රියාත්මක කළ සොලෑන්ගේ ගත අප්‍රාණික වී, දෑස් විශාල වීමට ගත වූයේ තත්පරයෙන් දාහෙන් පංගුවකි. දුම්රියෙහි තිරිංග පද්ධතිය සිය අණට අකීකරු බව තේරුම් යාම එයට හේතුවයි. ඔහු දිගින් දිගටම තිරිංග යෙදීමට උත්සහා කළද ප්‍රතිඵලය එකමය. ටොන් තුන්සියයකට වඩා බ‍රැති දුම්රිය කිසිඳු පාලනයකින් තොරව මගීන්ගෙන් පිරී ඉතිරී තිබූ ගාර්-ඩි-ලියෝන් බලා සිය සුපුරුදු වේගයෙන් ඇදෙමින් තිබුණි.

සොලෑන් කලබල විය. දුම්රියෙහි කොතැනක හෝ අතින් ක්‍රියා කරවන යාන්ත්‍රික තිරිංග පද්ධතියක් තිබිය යුතු බව ඔහු දැන සිටියත් ඒ කොහේදැයි ඔහුට නිශ්චිත නොමැත. බෝවී කැඳවූ ඔහු වහා ඒ පිළිබඳව සොයා බලා ක්‍රියාත්මක වන ලෙස ඔහුට දැනුම් දෙමින්ම තිරිංග යෙදීමෙහි දිගටම නිරතව සිටියේය. එය දුම්රියෙහි වේගය මද වශයෙන් අඩාල කළද ප්‍රමාණවත් නොවීය. අවසානයේදී උපරිම වශයෙන් කලබල වූ සොලෑන් විසින්, පාලන ඒකකය අමතා තමන්ගේ දුම්රියෙහි තිරිංග ක්‍රියාත්මක නොවන බව දැනුම් දී සියලුම දුම්රියයන් නතර කරවන ලෙස ඉල්ලා සිටියේය. එම කලබලයෙන්ම ඔහු විසින් අනතුරු ඇඟවීමේ සංඥා නාදයන් නිකුත් කරවීමට භාවිතා කරන බොත්තම භාවිතා කළේය. එමගින් ඇති කරවන සංඥාවන් මගීන් හට ශ්‍රවණය නොවන නමුත් පාලන ඒකකයේ හා අදාළ සීමාවෙහි වූ සියලුම දුම්රියයන්හී අනතුරු ඇඟවීමේ පද්ධතියන් සක්‍රීය කරවනු ලබයි. වහා ක්‍රියාත්මක වූ සංඥා කරුවන් සියලුම කොළ සංඥා රතු බවට හැරවූ අතර තත්පර කිහිපයකින් එක් දුම්රියයක් හැර ජාලයෙහි වූ අනෙකුත් සියලුම දුම්රියයන් නතරව තිබුණි. තමාට තවදුරටත් කළ හැකි දෙයක් නොමැති බැවින් සොලෑන් විසින් දුම්රියෙහි වූ සියලුම මගීන් පි‍ටුපසම පෙට්ටිය වෙත යොමු කරවමින් තමන්ද නියමු කුටිය අත හැර පි‍ටුපසට දිව ගියේ දිවිබේරා ගැනීමේ අරමුණිනි.

මේ අතර, ගාර්-ඩි-ලියෝන්හී ප්‍රමාද වූ මගී දුම්රියෙහි සහයකයා පැමිණි බැවින් ඔවුන් පිටත් වීමට සූදානම්ය. එහෙත් මේ වන විට ඔන්ඩ්‍රේ ටොන්ගී හට රතු සංඥා එළි නිකුත් වී තිබූ බැවින් පිටත්වීම තව දුරටත් ප්‍රමාදවන ලකුණු දිස් විය. රතු සංඥා නිකුත් වීමට බලපෑ හේතුව ඔන්ඩ්‍රේ ටොන්ගී හට ගැටලුවක් වුවද ඒවන විට නොනැවතී නාද වෙමින් පැවති අනතුරු හැඟවීමේ රේඩියෝ සංඥා නිසා කුමන කරුණක් අරභයා රතු සංඥා නිකුත්ව ඇත්දැයි දැනගැනීමට ඔහුට සිය රේඩියෝව භාවිතා කළ නොහැකි විය.

හවස 07:08 වන විට, ගාර්-ඩි-ලියෝන් බලා ඇදෙනා පාලනයකින් තොරවූ දුම්රිය සිය වේගය වැඩිකරගනිමින් ගමනාන්තය වෙත සමීප වෙමින් සිටියාය. ඒ වනවිටත් සොලෑන් විසින් සිය දුම්රියෙහී වූ සියලුම මගීන්ව අටවන හෙවත් අවසාන පෙට්ටිය වෙත ‍රැගෙන යාමට සමත් වී සිටියේය. විශාල ඝට්ටනයක් අපේක්ෂාවෙන් ඔවුන් සියලු දෙනා ගැහෙනා හදින් යුතුව බිම වැතිර සිටි අතර මේය සිය ජීවිතයේ අවසාන මොහොත විය හැකියැයි යන හැඟීම ඔවුන්ගේ සිත් සතන් භීතියෙන් පුරවාලූහ.

ඔන්ඩ්‍රේ ටොන්ගී තවමත් තමන්ගේ දුම්රිය රඳවාගෙන සිටීමට හේතුව නොදනී. මගීන් පිරුණු දුම්රියෙහි තෙරපී සිටීමෙන් ඇතිවූ අපහසුව නිසාම ඩොමිනික් පාවී එයින් බැස යාමට තීරණය කොට මගීන් අතරින් අසීරුවෙන් ගමන් කොට දුම්රියෙන් ඉවත්වූයේ වෙනත් විකල්පයක් බලා යාමටය. ඔබ ‍රැකවල් දේව දූතයන් හෝ ඉෂ්ට දේවතාවන් වෙනුවෙන් පෙනී සිට වාද කරයිනම්, ඩොමිනික් පාවී යනු ඒ සඳහා බැහැර කළ නොහැකි නිදර්ශනයකි.

තමන් සිටිනා ස්ථානය පසු කරමින් අසාමාන්‍ය වේගයකින් ඉදිරියට ඇදෙනා සොලෑන්ගේ දුම්රිය සංඥා කරුවන්ගේ ඇස ගැටෙනා විට වේලාව හවස 07:08 පසුවී තත්පර කිහිපයකි. ඔවුන්ගේ ශරිරයන්හී රුධිරය සීතල කරවමින්, දුම්රිය කලින් සැලසුම් කොට තිබූ වේදිකා අංක එක වෙනුවට, මගීන්ගෙන් පිරී ඉතිරී තිබුණු ඔන්ඩ්‍රේ ටොන්ගීගේ දුම්රිය නවතා තිබූ වේදිකා අංක දෙක වෙත ඇදෙනු දක්නා ලදී. වහාම ක්‍රියාත්මක වූ සංඥා කරුවන්, දුම්රියපළෙහි වූ මගීන් අමතා වහාම වේදිකා අංක දෙකෙහි වූ දුම්රියෙන් හා ඒ පරිශ්‍රයෙන් ඉවත් වෙන ලෙස දැනුම් දුන්හ. පිටත්වීමට නොඉවසිල්ලෙන් සිටි ඔන්ඩ්‍රේ ටොන්ගීගේ සවනත මෙම භයානක නිවේදනය පතිත විය. වහාම සිය දුම්රියෙහි වූ මගීන් ඇමතුම් පද්ධතිය ඔස්සේ මගීන් ඇමතු ඔන්ඩ්‍රේ ටොන්ගී, දුම්රියෙන් හැකි ඉක්මනින් ඉවත්වන ලෙස මගීන් හට දන්වා සිටියේය. නැවත නැවතත් ඔහුගේ නිවේදනය ප්‍රතිරාවය විය. වහා ක්‍රියාත්මක වූ මගීන් එකිනෙකා පරයමින් දුම්රියෙන් ඉවත්වීමට උත්සහකරනා එම මොහොතේම තමන් වෙත වේගයෙන් ඇදෙනා දුම්රිය ඔන්ඩ්‍රේ ටොන්ගීගේ දසුනට හසුවිය. එහෙත්, තවමත් මගීන් සිය දුම්රියෙහි පිරී ඉතිරී සිටින බව දත් ඔන්ඩ්‍රේ ටොන්ගී අනතුරින් පලායාම වෙනුවට සිය අසුනෙහි නිර්භීතව ‍රැඳී සිටිමින් දිගින් දිගටම මගීන් වෙත ඉවත්වීමේ නියෝගය නිකුත් කරමින් සිටියේය. සිය ජීවිතයේ අවසාන මොහොත අනුන් වෙනුවෙන් කැපකිරීමට තරම් ඔන්ඩ්‍රේ ටොන්ගී පරිත්‍යාගශීලී විය, නිර්භීත විය. ඉනික්බිතව;



video


oooooooo

අනතුරෙහි ප්‍රථම වින්දිතයා වූ ඔන්ඩ්‍රේ ටොන්ගී ක්ෂණිකවම මරු වැළදගත්තේය. ටොන්ගීගේ දුම්රියෙහි ප්‍රථම මැදිරියෙහි සිටි කොලෙට් අනතුරින් දරුණු තුවාල ලබා දිවි බේරාගැනීමට වාසනාවන්ත වූවාය.

"මුලින්ම මම හිතුවේ ඒක බෝම්බයක් වෙන්න ඇති කියලා. ඒක කොච්චරවෙලා තිබුණද කියලා මට මතකයක් නෑ. තත්පර දහයක් එහෙම නැත්නම් විස්සක් විතර වෙන්න ඇති. මට යන්තම් හිතාගන්න පුළුවන් වුණේ මාව මැරෙන්න යනවා කියන එක විතරයි." - කොලෙට් 

කොලෙට් , තත්පර කිහිපයකට පෙර සිය පුතණුවන් සමඟ සන්ධ්‍යාව ගතකරනාකාරය පිළිබඳව සිහින දැකීය. දැන් ඇය තවත් දරුණු තුවාල කරුවන් පිරිසක් සමඟ සුන් බුන් ගොඩක සිරවී ජීවිතය අයදිමින් සිටියාය. ක්ෂණික වෛද්‍ය ප්‍රතිකාර නොලදහොත් ඇයගේ තත්ත්වය අසාධ්‍ය වනු ඇත.

සෝලෑන්ගේ දුම්රියෙහි සිටි සියල්ලම පාහේ බරපතල තුවාල නොලබා දිවිගලවා ගැනීමට වාසනාවන්ත වූයේ අවසාන මැදිරියෙ ‍රැඳී සිටි බැවිනි. එහි ගෞරවය සෝලෑන් හට හිමිවිය යුතු වුවද අනෙක් මරණයන්ගේ වගකීමෙන් ඔහු නිදහස් වේද ?

අනතුරින් විනාඩි එකොළහකට පසු ප්‍රථම ගලවාගැනීමේ කණ්ඩායම ස්ථානයට ළඟා විය. චෙක් සිවිල් යුද්ධයේදීද සිය දායකත්වය ලබා දුන් ශල්‍ය වෛද්‍ය රෙනේ ජොන්කෝවිචී කණ්ඩායමේ ශල්‍ය වෛද්‍යවරයා වූ අතර අනතුර පිළිබඳව සිය අදහස් දක්වමින් ප්‍රකාශ කර සිටියේ තමන් මින්පෙර යුද්ධයේදී වත් එවැනි විනාශයක් නොදැක තිබූ බවයි.

"ඒක හරියටම සාඩින් කෑන් එකක් විවෘත්ත කළා වගේ. අත පය කැඩුණු, බිඳුණු, කැපුණු මළ සිරුරු කවුළු වලින් එල්ලෙමින් තිබුණ එම දර්ශනය ඉතාම බියජනකයි." - වෛද්‍ය රෙනේ 

විනාශයේ තරම ඉක්මනින්ම අවබෝධ කරගැනීමට හැකි වූ අතර ගලවා ගන්නන්ට අනුව සියයකට අධික මිනිසුන් ප්‍රමාණයක් සුන් බුන් අතර සිරවී සිටිති. කොලෙට් පකළේද ඔවුන්ගෙන් කෙනෙකි. කොලෙට් ඉදිරි පළමු මැදිරියෙහි ආසන දෙකක් අතර සිරවී සිටියාය. ඈ මෙන්ම තවත් බොහෝ පිරිසක් සුන්බුන් අතර සිරවී සිටියහ. වෛද්‍යවරු යුහුසුළු විය යුතු වුවද තුවාලකරුවන් වෙතට ළඟාවීමට වූ නොහැකියාව ඔවුන්ව දුර්මුඛ කරවීය. ගලවාගන්නන් විසින් යකඩ ආදී ද්‍රව්‍ය කපා දමා සුන්බුන් අතරින් ‍තුවාලකරුවන් පාදාගන්න තුරු ඔවුනට බලාසිටීමට සිදු වූහ. අවසානයේදී රාත්‍රී එකොළහට පමණ කොලෙට්ව නිදහස් කර ගැනීමට ගලවාගන්නන් සමත් වූවද තවත් බොහෝ ගණනක් ඒ වනවිටත් සුන්බුන් අතරය. දරුණු සිරවීමකට ලක්ව, බරපතල තුවාල ලබා සිටි මගීන්ව ගලවා ගැනීම උදෙසා ශල්‍ය වෛද්‍ය රෙනේ ඇතුළු කණ්ඩායමට දරුණු තීරණයකට යාමට පවා සිදු විය. ඔවුන්ව හැකිතාක් ඉක්මනින් ගලවා ගැනිම උදෙසා, සිරවී තිබූ සමහර ශරීරාංග කපා දැමීමේ තීරණය ගනු ලැබුවේ ජීවිතය ගලවාගැනීම වැදගත් බැවිනි. 

වේදිකාවට ගත් සැණින් කොලෙට් හට ඇතිවූ තිබූ හානිය විද්‍යාමාන විය. ඇයගේ සමහර අස්ථි බිඳි තිබුණු අතර ඉතා විශාල ප්‍රමාණයකින් රුධිරය වහනය වී තිබුණි. වෛද්‍යවරුන් විසින් ඇයට එම රාත්‍රියවත් පසු කිරීමට හැකි වේදැයි සැකපහළ කළ නමුත් ඇය එතරම්ම අවාසනාවන්ත නොවුණාය. රෝහලේදී ඇයගේ තත්ත්වය අසාධ්‍ය වුවද, වෛද්‍යවරු නැවතත් ඇයට ජීවය දීමට සමත් වූ බැවින් තුන් මසක් ඇවෑමෙන් ඇයට සිය පුතණුවන් හා එක්වීමේ භාග්‍ය හිමි විය.

පසු දින දහවල් දොළහා වනවිට ගලවා ගන්නන්ට ඉවත්කරගැනීමට ඉතිරිව තිබුණේ මළ සිරුරු පමණය. දුම්රියයන් දෙක දෙපසට වෙන් කළ අතර, කඩා වැදුණු දුම්රිය පරීක්ෂකයන්ගේ අත්අඩංගුවට පත්විය. 56 දෙනෙකුට ජීවිත අහිමි වී තිබුණු අතර 57දෙනෙකු තුවාල ලබා තිබුණි. ඔන්ඩ්‍රේ ටොන්ගී සිය ජීවිත පරිත්‍යාගයෙන් දැක්වූ නිර්භීතභාවය නොවන්නට මෙම සංඛ්‍යා මෙයට වඩා වැඩි අගයක් වනවා නොඅනුමානය. අනෙක් අතට ඩැනියෙල් සෝලෑන් ප්‍රදර්ශනය කළ බියසුලුභාවය නොවන්නට මෙම මුළු කතාවම මෙයට වෙනස් ආකාරයකට අවසන් වන්නට තිබුණි. කෙසේවෙතත් සිදුවීමට නියමිත වූ දේ සියලු බාධක මැඩගනිමින් සිදුවී අවසන්ය. එය පැරිසේ සිදුවූ දරුණුව දුම්රිය ඛේදවාචකය ලෙසට ඉතිහාසයට එක් වී ඇත.

ප්‍රංශය සතුව යුරෝපයේ අති නවීනම දුම්රිය පද්ධතිය විය. මෙවන්වූ අනතුරු වළක්වා ගැනීම සඳහාම සකස් වූ ආරක්ෂක විධිවිධාන බොහොමයක්ම තිබුණද, ඒ සියල්ල පරදා මෙම අනතුර සිදු වූයේ කෙසේද ? මෙම වර්ගයේ දුම්රිය කට්ටල තවත් බොහෝමයක් ප්‍රංශයේ රේල් පීලි මත වූ අතර ඒවාත් මෙවන් වූ අනතුරකට භාජනය වීම හැකියාවක් පවතීද ? සිද්ධිය පිළිබඳ සම්පූර්ණ පරීක්ෂණයක් උදෙසා ප්‍රංශ රජය වෙනුවෙන් හය දෙනෙකුගෙන් සැදුම්ලත් කණ්ඩායමක් පත් කෙරිණි. 

Memorial of the crash inside the station
ගාර්-ඩි-ලියෝන් දුම්රියපළෙහි ඇති සිහිවටන ඵලකය.



අනතුරට ලක්වූ වර්ගයේ දුම්රියක්


Seconds From Disaster S02E11 - Runaway Train  ඇසුරින් සකස් කෙරුවේ;


~~සෙන්නා / 30.04.2014

වෙනත් මූලාශ්‍ර;
1. http://secondsfromdisaster.net/s02e11-paris-train-crash-gare-de-lyon-rail-accident/
2. http://en.wikipedia.org/wiki/Gare_de_Lyon_rail_accident