Wednesday, April 30, 2014

ගාර්-ඩි-ලියෝන් දුම්රිය අනතුර | 1988.06.27

2014ක්වූ බක් මස 30 වනදා

සිදුවීමට නියමිත යමක් වැළැක්විය නොහැක යන්න සනාථ කරනා හොඳම නිදර්ශනයකි මේ. සිද්ධිය සිදුවීමට අවැසි සාධක එනම් දම්වැල ඇදීම, රියදුරාගේ නොදැනුවත්කම, සහයකයෙකුගේ පමාව, නැවතුම්පළක් මගහැරීමට දෙන උපදෙස, අනතුරු හැඟවීමේ සංඥාව, නියමු කුටිය අතහැරයාම එකින් එක පෙළගැසෙමින් අනතුර කරා යන ගමන විශ්මයජනකය. වැඩි විස්තර අවැසිද ? ගොඩ වන්න ගාර්-ඩි-ලියෝන් බලා ඇදෙනා ඩැනියල් සොලෑන්ගේ දුම්රියට. 


+++++

1988 ජුනි 27 වෙනිදා සවස පැරිසියේ ගාර්-ඩි-ලියෝන් (Gare de Lyon) දුම්රිය පළ බලා ඇදෙනා මගී දුම්රියකි. ප්‍රංශයේ රාජ්‍ය දුම්රිය සේවය වන SNCF සතුවු, අංක 153944 දරණ මෙම දුම්රිය එදින සිය සුපුරුදු නැවතුම් පලක් වූ වෙයර්-ඩි-මෙසොන්ස් ( Vert de Maisones ) දුම්රියපළෙහි නතර නොවී ඉදිරියටම ඇදුණේ SNCF බලධාරීන් විසින් ගිම්හාන කාලසටහන යටතේ එම දුම්රියපළ සේවයෙන් ඉවත් කොට තිබූ බැවිනි. එහෙත් ! හදිසියේම නොසිදුවිය යුතු, කලාතුරකින් සිදුවන අමුත්තක් සිදුවිය. දුම්රියේ හදිසි තිරිංග පද්ධතිය ක්‍රියාත්මක වූ බව අගවන නළා හඬ ඇසෙනා විටම වාගේ, ස්ව්‍යංක්‍රීයව නතර වූ දුම්රියෙන් බැස, දිව ගොස් නොපෙනී ගිය කාන්තාවක් දුම්රියෙහි රියදුරු ඩැනියෙල් සොලෑන් හා ඔහුගේ සහයකයා වූ ජෝන් බෝවී විසින් නිරික්ෂණය කරනා ලදී. ස්ව්‍යංක්‍රීයව හිරවූ තිරිංග පද්ධතිය නැවත යථා තත්ත්වයට පත් කිරීම විනාඩි කිහිපයක කාර්‍යයක් වුවද සොලෑන් විසින් සියල්ලට පළමුව ගාර්-ඩි-ලියෝන්හී පාලක මැදිරිය අමතා සිද්ධිය වාර්තාකර සිටියේය. සොලෑන් සහ බෝවී තිරිංග පද්ධතිය යථා තත්ත්වයට ගැනීමට වෙහෙසෙනා අතරතුර, දුම්රියෙහි පමාවක් අපේක්ෂාකළ සමහර මගීන් සිය ගමනාත්තයට ළඟාවීම සඳහා වෙනත් විකල්පයන් සොයා දුම්රියෙන් බැස ගිය අතර අනෙක් මගීන් සිය ගමනාන්තයට මෙම දුම්රියෙන්ම ළඟා වීම උදෙසා නොඉවසිල්ලෙන් යුතුව ‍රැඳී සිටියහ.

ඔවුන්ගේ ගමනාන්තය වූ ගාර්-ඩි-ලියෝන් දුම්රියපළ, රටෙහි දකුණු සහ නැගෙනහිර ප්‍රදේශයන් ආවරණය වන දුම්රිය සේවයේ ප්‍රධානතම දුම්රියපළකි. ප්‍රංශයෙහි කාර්‍යය බහුලම දුම්රියපළ වලින් එකකි. නගර අභ්‍යන්තරයෙහි හා නගරාන්තරව ධාවනයෙහි යෙදුණු දුම්රියන් ගාර්-ඩි-ලියෝන් වෙතින් සේවා පහසුකම් ලැබූහ. දුම්රියපළ වෙත පිවිසෙන හා පිටවෙන සෑම දුම්රියක් පිළිබඳවම නිරීක්ෂණය කිරීම, ගමන් වාර පාලනය කිරීම මධ්‍යම පාලක මැදිරියෙන් සිදු විය. අදාළ දින රාත්‍රියෙහි එහි සේවයේ නියුතුව සිටි කාර්‍යය භාර නිලධාරියා වුයේ ඔන්ඩ්‍රේ ටෝලන්ස්ය. එම රාත්‍රියේදී, 360කට අධිකවූ දුම්රිය ගමන්වාර සංඛ්‍යාවක් සුමටව හා ආරක්ෂාකාරීව මෙහෙයවීමේ වගකීම ඔහු අතේ ‍රැඳී තිබුණි. එයට අමතරව එකල්හී ප්‍රංශය මුහුණ දෙමින් සිටි ත්‍රස්ත තර්ජනයන්, දුම්රියයන් හා ඒවායෙහි මගීන් වෙත සිදු කළ හැකි විනාශකාරී ක්‍රියාවන් පිළිබඳව අවධියෙන් සිටීමද ඔහුගේ රාජකාරියෙහිම තවත් කොටසකි.

එක් දරු මවක්වූ කොලෙට් පකලේ සිය රාජකාරියෙන් පසු නිවස බලා යාමට දුම්රිය අල්ලා ගැනිම සඳහා සුහුසුළු වූවාය. සැමියාගෙන් වෙන්ව, දහතුන් හැවිරිදි දරුවා සමඟ විසූ ඇය රාජකාරිය නිමවූ සැණින් නිවස බලා යාමට උත්සුක වන්නේ තනියම නිවසේ සිටින දරුවා උදෙසාමය. සෝලෑන් සහ බෝවී තිරිංග පද්ධතිය යථා තත්ත්වයට ගැනිමට වෙහෙසෙනා එම මොහොතේම, කොලෙට් විසින් ගාර්-ඩි-ලියෝන් දුම්රියපළ බලා හනික දුවමින් සිටියාය. එම මොහොතේම ලූවර් කලාගාරයෙහි සේවය කළ හතළිස් හැවිරිදි ඩොමිනික් පාවීද ගාර්-ඩි-ලියෝන් වෙත දුවමින් සිටියේ සිය සුපුරුදු දුම්රිය අල්ලා ගන්නා අටියෙනි. ඔවුන් දෙදෙනා පමණක් නොව තවත් දහස් ගණනකගේ එම මොහොතේ අරමුණ වූයේ ගාර්-ඩි-ලියෝන් පමණකි.

පස්වරු හත පමණවන විට සොලෑන් සහ බෝවී දුම්රියෙහි තිරිංග පද්ධතිය යාථා තත්ත්වයට පත්කරගැනීමට සමත් වූහ. නමුත් ඒ සඳහා ඔවුනට බලාපොරොත්තු වූවාට වඩා කාලයක් ගතවූ අතර ඒ වනවිටත් දුම්රිය විනාඩි විස්සකින් පමණ ප්‍රමාදවී තිබුණි. ගමන නැවත ආරම්භයට පේර සොලෑන් විසින් ඔන්ඩ්‍රේ ටෝලන්ස් අමතා තත්ත්වය වාර්තා කර සිටි විට ප්‍රමාදය වළක්වා ගනිමින් නියමිත වේලාවට ගාර්-ඩි-ලියෝන් වෙත ළඟා වීම සඳහා ඊළඟ නැවතුම වූ මෙයිසාන් අල්ෆෝර්ට් මග හරින ලෙස ටෝලන්ස් විසින් සොලෑන්ස් හට දන්වා සිටියේය.

මේ අතර ගාර්-ඩි-ලියෝන් වෙතින් පිටත් වීමට සූදානම්ව තිබූ තවත් මගී දුම්රියකි. කොලෙට් සහ පාවී යන දෙදෙනාගේම ඉලක්කය වූයේ මෙම දුම්රිය අල්ලා ගැනීමයි. එදින සහයකයාගේ වූ ප්‍රමාදයක් නිසා අදාළ දුම්රියට, කාලසටහනට අනුව පිටත් වීමට නොහැකි විය. රියදුරු ඔන්ඩ්‍රේ ටොන්ගී සහ දහස් ගණනක් වූ මගීන් සහයකයාගේ පැමිණීම වෙනුවෙන් ගාර්-ඩි-ලියෝන්හී නොඉවසිල්ලෙන් පසු වූහ. සොලෑන්ගේ දුම්රිය නැවැත්වීමට සැලසුම් කර තිබුණේ ඔන්ඩ්‍රේ ටොන්ගීගේ දුම්රිය නවතා තිබූ වේදීකාවේම බැවින්, සොලෑන්ගේ පැමිණීමට ප්‍රථම ඔන්ඩ්‍රේ ටොන්ගී සිය දුම්රිය සමඟ පිටත්වීම අවැසි වී තිබුණි. එහෙත් එය අත්‍යාවශ්‍ය කාරණයක් නොවුනේ යම් ප්‍රමාදයක් සිදුවුවහොත් සංඥා කරුවන් හට සොලෑන්ගේ දුම්රිය වෙනත් වේදිකාවකට යොමු කිරීමට පියවර ගත හැකි බැවිනි. එය ස්ව්යංක්‍රීයව සිදු වීමට, කලින් සැලසුම් කොට තිබූ ක්‍රියාවලියකි.

වේලාව සවස 07:07 වන විට සොලෑන්ගේ දුම්රිය පැයට සැතපුම් 16කට වඩා අධික වේගයකින් ගාර්-ඩි-ලියෝන් බලා ඇදෙමින් තිබුණි. ගාර්-ඩි-ලියෝන් ආසන්න වන විට කහ පැහැති සංඥා එළි විසින් සිය දුම්රියෙහි වේගය අඩු කරගන්නා ලෙස සොලෑන් හට සිහි කැඳවූහ. එයට අවනතව තිරිංග ලිවරය ක්‍රියාත්මක කළ සොලෑන්ගේ ගත අප්‍රාණික වී, දෑස් විශාල වීමට ගත වූයේ තත්පරයෙන් දාහෙන් පංගුවකි. දුම්රියෙහි තිරිංග පද්ධතිය සිය අණට අකීකරු බව තේරුම් යාම එයට හේතුවයි. ඔහු දිගින් දිගටම තිරිංග යෙදීමට උත්සහා කළද ප්‍රතිඵලය එකමය. ටොන් තුන්සියයකට වඩා බ‍රැති දුම්රිය කිසිඳු පාලනයකින් තොරව මගීන්ගෙන් පිරී ඉතිරී තිබූ ගාර්-ඩි-ලියෝන් බලා සිය සුපුරුදු වේගයෙන් ඇදෙමින් තිබුණි.

සොලෑන් කලබල විය. දුම්රියෙහි කොතැනක හෝ අතින් ක්‍රියා කරවන යාන්ත්‍රික තිරිංග පද්ධතියක් තිබිය යුතු බව ඔහු දැන සිටියත් ඒ කොහේදැයි ඔහුට නිශ්චිත නොමැත. බෝවී කැඳවූ ඔහු වහා ඒ පිළිබඳව සොයා බලා ක්‍රියාත්මක වන ලෙස ඔහුට දැනුම් දෙමින්ම තිරිංග යෙදීමෙහි දිගටම නිරතව සිටියේය. එය දුම්රියෙහි වේගය මද වශයෙන් අඩාල කළද ප්‍රමාණවත් නොවීය. අවසානයේදී උපරිම වශයෙන් කලබල වූ සොලෑන් විසින්, පාලන ඒකකය අමතා තමන්ගේ දුම්රියෙහි තිරිංග ක්‍රියාත්මක නොවන බව දැනුම් දී සියලුම දුම්රියයන් නතර කරවන ලෙස ඉල්ලා සිටියේය. එම කලබලයෙන්ම ඔහු විසින් අනතුරු ඇඟවීමේ සංඥා නාදයන් නිකුත් කරවීමට භාවිතා කරන බොත්තම භාවිතා කළේය. එමගින් ඇති කරවන සංඥාවන් මගීන් හට ශ්‍රවණය නොවන නමුත් පාලන ඒකකයේ හා අදාළ සීමාවෙහි වූ සියලුම දුම්රියයන්හී අනතුරු ඇඟවීමේ පද්ධතියන් සක්‍රීය කරවනු ලබයි. වහා ක්‍රියාත්මක වූ සංඥා කරුවන් සියලුම කොළ සංඥා රතු බවට හැරවූ අතර තත්පර කිහිපයකින් එක් දුම්රියයක් හැර ජාලයෙහි වූ අනෙකුත් සියලුම දුම්රියයන් නතරව තිබුණි. තමාට තවදුරටත් කළ හැකි දෙයක් නොමැති බැවින් සොලෑන් විසින් දුම්රියෙහි වූ සියලුම මගීන් පි‍ටුපසම පෙට්ටිය වෙත යොමු කරවමින් තමන්ද නියමු කුටිය අත හැර පි‍ටුපසට දිව ගියේ දිවිබේරා ගැනීමේ අරමුණිනි.

මේ අතර, ගාර්-ඩි-ලියෝන්හී ප්‍රමාද වූ මගී දුම්රියෙහි සහයකයා පැමිණි බැවින් ඔවුන් පිටත් වීමට සූදානම්ය. එහෙත් මේ වන විට ඔන්ඩ්‍රේ ටොන්ගී හට රතු සංඥා එළි නිකුත් වී තිබූ බැවින් පිටත්වීම තව දුරටත් ප්‍රමාදවන ලකුණු දිස් විය. රතු සංඥා නිකුත් වීමට බලපෑ හේතුව ඔන්ඩ්‍රේ ටොන්ගී හට ගැටලුවක් වුවද ඒවන විට නොනැවතී නාද වෙමින් පැවති අනතුරු හැඟවීමේ රේඩියෝ සංඥා නිසා කුමන කරුණක් අරභයා රතු සංඥා නිකුත්ව ඇත්දැයි දැනගැනීමට ඔහුට සිය රේඩියෝව භාවිතා කළ නොහැකි විය.

හවස 07:08 වන විට, ගාර්-ඩි-ලියෝන් බලා ඇදෙනා පාලනයකින් තොරවූ දුම්රිය සිය වේගය වැඩිකරගනිමින් ගමනාන්තය වෙත සමීප වෙමින් සිටියාය. ඒ වනවිටත් සොලෑන් විසින් සිය දුම්රියෙහී වූ සියලුම මගීන්ව අටවන හෙවත් අවසාන පෙට්ටිය වෙත ‍රැගෙන යාමට සමත් වී සිටියේය. විශාල ඝට්ටනයක් අපේක්ෂාවෙන් ඔවුන් සියලු දෙනා ගැහෙනා හදින් යුතුව බිම වැතිර සිටි අතර මේය සිය ජීවිතයේ අවසාන මොහොත විය හැකියැයි යන හැඟීම ඔවුන්ගේ සිත් සතන් භීතියෙන් පුරවාලූහ.

ඔන්ඩ්‍රේ ටොන්ගී තවමත් තමන්ගේ දුම්රිය රඳවාගෙන සිටීමට හේතුව නොදනී. මගීන් පිරුණු දුම්රියෙහි තෙරපී සිටීමෙන් ඇතිවූ අපහසුව නිසාම ඩොමිනික් පාවී එයින් බැස යාමට තීරණය කොට මගීන් අතරින් අසීරුවෙන් ගමන් කොට දුම්රියෙන් ඉවත්වූයේ වෙනත් විකල්පයක් බලා යාමටය. ඔබ ‍රැකවල් දේව දූතයන් හෝ ඉෂ්ට දේවතාවන් වෙනුවෙන් පෙනී සිට වාද කරයිනම්, ඩොමිනික් පාවී යනු ඒ සඳහා බැහැර කළ නොහැකි නිදර්ශනයකි.

තමන් සිටිනා ස්ථානය පසු කරමින් අසාමාන්‍ය වේගයකින් ඉදිරියට ඇදෙනා සොලෑන්ගේ දුම්රිය සංඥා කරුවන්ගේ ඇස ගැටෙනා විට වේලාව හවස 07:08 පසුවී තත්පර කිහිපයකි. ඔවුන්ගේ ශරිරයන්හී රුධිරය සීතල කරවමින්, දුම්රිය කලින් සැලසුම් කොට තිබූ වේදිකා අංක එක වෙනුවට, මගීන්ගෙන් පිරී ඉතිරී තිබුණු ඔන්ඩ්‍රේ ටොන්ගීගේ දුම්රිය නවතා තිබූ වේදිකා අංක දෙක වෙත ඇදෙනු දක්නා ලදී. වහාම ක්‍රියාත්මක වූ සංඥා කරුවන්, දුම්රියපළෙහි වූ මගීන් අමතා වහාම වේදිකා අංක දෙකෙහි වූ දුම්රියෙන් හා ඒ පරිශ්‍රයෙන් ඉවත් වෙන ලෙස දැනුම් දුන්හ. පිටත්වීමට නොඉවසිල්ලෙන් සිටි ඔන්ඩ්‍රේ ටොන්ගීගේ සවනත මෙම භයානක නිවේදනය පතිත විය. වහාම සිය දුම්රියෙහි වූ මගීන් ඇමතුම් පද්ධතිය ඔස්සේ මගීන් ඇමතු ඔන්ඩ්‍රේ ටොන්ගී, දුම්රියෙන් හැකි ඉක්මනින් ඉවත්වන ලෙස මගීන් හට දන්වා සිටියේය. නැවත නැවතත් ඔහුගේ නිවේදනය ප්‍රතිරාවය විය. වහා ක්‍රියාත්මක වූ මගීන් එකිනෙකා පරයමින් දුම්රියෙන් ඉවත්වීමට උත්සහකරනා එම මොහොතේම තමන් වෙත වේගයෙන් ඇදෙනා දුම්රිය ඔන්ඩ්‍රේ ටොන්ගීගේ දසුනට හසුවිය. එහෙත්, තවමත් මගීන් සිය දුම්රියෙහි පිරී ඉතිරී සිටින බව දත් ඔන්ඩ්‍රේ ටොන්ගී අනතුරින් පලායාම වෙනුවට සිය අසුනෙහි නිර්භීතව ‍රැඳී සිටිමින් දිගින් දිගටම මගීන් වෙත ඉවත්වීමේ නියෝගය නිකුත් කරමින් සිටියේය. සිය ජීවිතයේ අවසාන මොහොත අනුන් වෙනුවෙන් කැපකිරීමට තරම් ඔන්ඩ්‍රේ ටොන්ගී පරිත්‍යාගශීලී විය, නිර්භීත විය. ඉනික්බිතව;





oooooooo

අනතුරෙහි ප්‍රථම වින්දිතයා වූ ඔන්ඩ්‍රේ ටොන්ගී ක්ෂණිකවම මරු වැළදගත්තේය. ටොන්ගීගේ දුම්රියෙහි ප්‍රථම මැදිරියෙහි සිටි කොලෙට් අනතුරින් දරුණු තුවාල ලබා දිවි බේරාගැනීමට වාසනාවන්ත වූවාය.

"මුලින්ම මම හිතුවේ ඒක බෝම්බයක් වෙන්න ඇති කියලා. ඒක කොච්චරවෙලා තිබුණද කියලා මට මතකයක් නෑ. තත්පර දහයක් එහෙම නැත්නම් විස්සක් විතර වෙන්න ඇති. මට යන්තම් හිතාගන්න පුළුවන් වුණේ මාව මැරෙන්න යනවා කියන එක විතරයි." - කොලෙට් 

කොලෙට් , තත්පර කිහිපයකට පෙර සිය පුතණුවන් සමඟ සන්ධ්‍යාව ගතකරනාකාරය පිළිබඳව සිහින දැකීය. දැන් ඇය තවත් දරුණු තුවාල කරුවන් පිරිසක් සමඟ සුන් බුන් ගොඩක සිරවී ජීවිතය අයදිමින් සිටියාය. ක්ෂණික වෛද්‍ය ප්‍රතිකාර නොලදහොත් ඇයගේ තත්ත්වය අසාධ්‍ය වනු ඇත.

සෝලෑන්ගේ දුම්රියෙහි සිටි සියල්ලම පාහේ බරපතල තුවාල නොලබා දිවිගලවා ගැනීමට වාසනාවන්ත වූයේ අවසාන මැදිරියෙ ‍රැඳී සිටි බැවිනි. එහි ගෞරවය සෝලෑන් හට හිමිවිය යුතු වුවද අනෙක් මරණයන්ගේ වගකීමෙන් ඔහු නිදහස් වේද ?

අනතුරින් විනාඩි එකොළහකට පසු ප්‍රථම ගලවාගැනීමේ කණ්ඩායම ස්ථානයට ළඟා විය. චෙක් සිවිල් යුද්ධයේදීද සිය දායකත්වය ලබා දුන් ශල්‍ය වෛද්‍ය රෙනේ ජොන්කෝවිචී කණ්ඩායමේ ශල්‍ය වෛද්‍යවරයා වූ අතර අනතුර පිළිබඳව සිය අදහස් දක්වමින් ප්‍රකාශ කර සිටියේ තමන් මින්පෙර යුද්ධයේදී වත් එවැනි විනාශයක් නොදැක තිබූ බවයි.

"ඒක හරියටම සාඩින් කෑන් එකක් විවෘත්ත කළා වගේ. අත පය කැඩුණු, බිඳුණු, කැපුණු මළ සිරුරු කවුළු වලින් එල්ලෙමින් තිබුණ එම දර්ශනය ඉතාම බියජනකයි." - වෛද්‍ය රෙනේ 

විනාශයේ තරම ඉක්මනින්ම අවබෝධ කරගැනීමට හැකි වූ අතර ගලවා ගන්නන්ට අනුව සියයකට අධික මිනිසුන් ප්‍රමාණයක් සුන් බුන් අතර සිරවී සිටිති. කොලෙට් පකළේද ඔවුන්ගෙන් කෙනෙකි. කොලෙට් ඉදිරි පළමු මැදිරියෙහි ආසන දෙකක් අතර සිරවී සිටියාය. ඈ මෙන්ම තවත් බොහෝ පිරිසක් සුන්බුන් අතර සිරවී සිටියහ. වෛද්‍යවරු යුහුසුළු විය යුතු වුවද තුවාලකරුවන් වෙතට ළඟාවීමට වූ නොහැකියාව ඔවුන්ව දුර්මුඛ කරවීය. ගලවාගන්නන් විසින් යකඩ ආදී ද්‍රව්‍ය කපා දමා සුන්බුන් අතරින් ‍තුවාලකරුවන් පාදාගන්න තුරු ඔවුනට බලාසිටීමට සිදු වූහ. අවසානයේදී රාත්‍රී එකොළහට පමණ කොලෙට්ව නිදහස් කර ගැනීමට ගලවාගන්නන් සමත් වූවද තවත් බොහෝ ගණනක් ඒ වනවිටත් සුන්බුන් අතරය. දරුණු සිරවීමකට ලක්ව, බරපතල තුවාල ලබා සිටි මගීන්ව ගලවා ගැනීම උදෙසා ශල්‍ය වෛද්‍ය රෙනේ ඇතුළු කණ්ඩායමට දරුණු තීරණයකට යාමට පවා සිදු විය. ඔවුන්ව හැකිතාක් ඉක්මනින් ගලවා ගැනිම උදෙසා, සිරවී තිබූ සමහර ශරීරාංග කපා දැමීමේ තීරණය ගනු ලැබුවේ ජීවිතය ගලවාගැනීම වැදගත් බැවිනි. 

වේදිකාවට ගත් සැණින් කොලෙට් හට ඇතිවූ තිබූ හානිය විද්‍යාමාන විය. ඇයගේ සමහර අස්ථි බිඳි තිබුණු අතර ඉතා විශාල ප්‍රමාණයකින් රුධිරය වහනය වී තිබුණි. වෛද්‍යවරුන් විසින් ඇයට එම රාත්‍රියවත් පසු කිරීමට හැකි වේදැයි සැකපහළ කළ නමුත් ඇය එතරම්ම අවාසනාවන්ත නොවුණාය. රෝහලේදී ඇයගේ තත්ත්වය අසාධ්‍ය වුවද, වෛද්‍යවරු නැවතත් ඇයට ජීවය දීමට සමත් වූ බැවින් තුන් මසක් ඇවෑමෙන් ඇයට සිය පුතණුවන් හා එක්වීමේ භාග්‍ය හිමි විය.

පසු දින දහවල් දොළහා වනවිට ගලවා ගන්නන්ට ඉවත්කරගැනීමට ඉතිරිව තිබුණේ මළ සිරුරු පමණය. දුම්රියයන් දෙක දෙපසට වෙන් කළ අතර, කඩා වැදුණු දුම්රිය පරීක්ෂකයන්ගේ අත්අඩංගුවට පත්විය. 56 දෙනෙකුට ජීවිත අහිමි වී තිබුණු අතර 57දෙනෙකු තුවාල ලබා තිබුණි. ඔන්ඩ්‍රේ ටොන්ගී සිය ජීවිත පරිත්‍යාගයෙන් දැක්වූ නිර්භීතභාවය නොවන්නට මෙම සංඛ්‍යා මෙයට වඩා වැඩි අගයක් වනවා නොඅනුමානය. අනෙක් අතට ඩැනියෙල් සෝලෑන් ප්‍රදර්ශනය කළ බියසුලුභාවය නොවන්නට මෙම මුළු කතාවම මෙයට වෙනස් ආකාරයකට අවසන් වන්නට තිබුණි. කෙසේවෙතත් සිදුවීමට නියමිත වූ දේ සියලු බාධක මැඩගනිමින් සිදුවී අවසන්ය. එය පැරිසේ සිදුවූ දරුණුව දුම්රිය ඛේදවාචකය ලෙසට ඉතිහාසයට එක් වී ඇත.

ප්‍රංශය සතුව යුරෝපයේ අති නවීනම දුම්රිය පද්ධතිය විය. මෙවන්වූ අනතුරු වළක්වා ගැනීම සඳහාම සකස් වූ ආරක්ෂක විධිවිධාන බොහොමයක්ම තිබුණද, ඒ සියල්ල පරදා මෙම අනතුර සිදු වූයේ කෙසේද ? මෙම වර්ගයේ දුම්රිය කට්ටල තවත් බොහෝමයක් ප්‍රංශයේ රේල් පීලි මත වූ අතර ඒවාත් මෙවන් වූ අනතුරකට භාජනය වීම හැකියාවක් පවතීද ? සිද්ධිය පිළිබඳ සම්පූර්ණ පරීක්ෂණයක් උදෙසා ප්‍රංශ රජය වෙනුවෙන් හය දෙනෙකුගෙන් සැදුම්ලත් කණ්ඩායමක් පත් කෙරිණි. 

Memorial of the crash inside the station
ගාර්-ඩි-ලියෝන් දුම්රියපළෙහි ඇති සිහිවටන ඵලකය.



අනතුරට ලක්වූ වර්ගයේ දුම්රියක්


Seconds From Disaster S02E11 - Runaway Train  ඇසුරින් සකස් කෙරුවේ;


~~සෙන්නා / 30.04.2014

වෙනත් මූලාශ්‍ර;
1. http://secondsfromdisaster.net/s02e11-paris-train-crash-gare-de-lyon-rail-accident/
2. http://en.wikipedia.org/wiki/Gare_de_Lyon_rail_accident


Monday, April 21, 2014

ගොදුරක්වූ දඩයම්කරු නොහොත් වෘත්තීමය කැපවීම...

2014ක්වූ බක් මස 21වෙනිදා



ඒ, සිකුරාදා හවස එක්තරා පුද්ගලයෙක් ගාලු කො‍ටුවේ ඇවිදිමින් සිටියා. අපි ඔහුට සෙබ්කා කියමු. විශාල ගස් වලින් ආවරණය වෙලා තිබුණ ගාලු කො‍ටුව සෙබ්කාගේ හිත නොගත්තා කිව්වොත් බොරුවක් වගේම ඒ වෙලාවෙ ඔහු හිටියේ තනියමයි කිව්වොත් ඒකත් බොරුවක්. සිහිල් සුවය විඳිමින් සෙමින් සෙමින් ඇවිද ගිය සෙබ්කාගේ අවධානය අමුතු දසුනකට යොමු වුණා. මුලු ලෝකයම අමතක කරදමා සිය වෘත්තියෙහි, භාවනාවකට සමවැදුණු භාවනායෝගියෙක් සේ යෙදී සිටිය ඒ අපූරු තරුණයා සෙබ්කාගේ හිත ඒක්ෂණයෙන් පැහැර ගැනීමේ උපරිම ප්‍රතිඵලය වුණේ සෙබ්කාගේ අතේ තිබුණ කැමරාව "සට" "සට" අනුකරණයෙන් ක්‍රියාත්මක වීමයි. කැමරාව ක්‍රියාත්මක වෙමින් තිබූ ඒ නිමේෂයේම සෙබ්කාගේ මුවෙහි මද හසක් නැගුණා. ඒ, ගොදුරකට කුරුමානම් අල්ලමින් සිටින විලෝපීයෙකු මතට කඩා පනින තවත් විලෝපීයකුගේ දසුනක් ඔහුගේ මනසේ ඇඳී යාම නිසයි.







රාජකාරිය දේවකාරියකි.






මුළු ලොවම අමතක කර








සාර්ථකත්වය මනිමින්




O

O

O

O


O


O



මේ සියලු උත්සහයන් මේ සඳහාය. ඔහු සිය ගනුදෙනුකරුවනට සාධාරණයක් ඉෂ්ට කරන්නට ඇත්ද ?? 

                                                                                                                                                                 

Coming soon....

¥ සි ජීවිතයේ අවසාන නිමේෂයත් අන් අයගේ යහපත වෙනුවෙන්ම වැය කොට, අනතුර පෙනි පෙනීත් එයින් පලා නොගිය දුම්රිය රියදුරෙක්. 
¥ සිය ආත්මාර්ථකාමී පරමාර්ථයන් උදෙසාම වගකීමකින් තොරව ක්‍රියා කළ කාන්තාවක්. 
¥ සිය වෘත්තිය පිළිබඳ නිසි දැනුමකින් යුක්ත නොවූ තවත් දුම්රිය රියදුරෙක් සහ සහායකයෙක්. 
¥ සිදුවූ කිසිත් නොදැන සිය ජීවිත වලින් වන්දි ගෙවූ ජීවිත 56ක්....

සිනමා පටයක්ද ? ප්‍රබන්ධයක්ද ?  ප්‍රබන්ධ පරදන සත්‍ය කතාවක්ද ?

Sunday, April 13, 2014

තීන්දුව...............


2014ක්වූ බක් මස 13වෙනිදා,
  • බිමට ගොම මැටි ගෑ, වරිච්චි ගෙය කඩා දමා ගඩොල් හා සිමෙන්ති මගින් නිවස තැනීම,
  • කුඹුර අස්වැද්දවීමට කෘෂිරාසායන හා පොහොර වර්ග භාවිතා කිරීම,
  • සීසෑමට හා කොළ පෑගීමට ගවයන් වෙනුවට යන්ත්‍ර පරිහරණය කිරීම,
  • ලාම්පු, පහන්, හුළුඅතු හා පන්දම් වෙනුවට විදුලිය, විදුලි පන්දම් භාවිතා කිරීම,
  • දරුවන්ට අධ්‍යාපනය ලබා දීම මගින් ඔවුන්ව උසස් ‍රැකියා වෙත යොමු කිරීම,
  • කුඹුරු පුරන් වීමට හැර සිය දරුවන් ‍රැකියා සඳහා නගරයට හා පිටරටට යොමු කිරීම,
  • බිරිඳව ගෘහ සේවය සඳහා පිට රට පැටවීම.
  • පාරම්පරික රස කැවිලි හා ආහාර වර්ග නොසෑදීම තුළින් එවන්වූ ආහාර වර්ග ජාතියට අහිමි කිරීම,
  • අලුත් අවුරුදු සිරිත් විරිත් නිසි පරිදි ඉෂ්ට නොකිරීම,
  • ආයුර්වේද ප්‍රතිකාර වෙනුවට බටහිර ප්‍රතිකාර ක්‍රම වෙත යොමු වීම තුළින් වෙද මහතාව සමාජයෙන් ඉවත් කිරීම

යන ඉහත කී භයානක අපරාධයන් හේතුකොටගෙන, යුශ්මතා විසින් මේ උත්තරීතර රාජ්‍යයේ නගරවාසී, ඉහළ මධ්‍යම පාන්තිකයන් හා ධනවතුන් හට;

  • රූපවාහිනිය මගින්වත් ගොම මැටි ගෑ වරිච්චි නිවසක් දැකිමේ අවස්ථාව අහිමි කිරීම,
  • වස විෂ නැති ආහාර ගැනීමට තිබූ අවස්ථාව අහිමි කිරීම,
  • ගවයන් මගින් ගොවිතැන් කරනා දර්ශනය හා ඒ හා බැඳුණු  සිරිත් විරිත් අධ්‍යයනයට, වින්දනයට තිබූ අවස්ථා අහිමි කිරීම,
  • සිය බැලමෙහෙවර සඳහා පිරිස් අහිමි කිරීම
  • අලුත් අවුරුදු සිරිය විඳ ගැනීමේ අවස්ථාව අහිමි කිරීම,
  • වාර්ෂිකව ඔවුන් විසින් සංවිධානය කරනු ලබන ක්‍රීඩා උත්සව සඳහා සහභාගී වීමට පිරිස් නොමැති කිරීම,
  • ඔවුන් විසින් නිෂ්පාදනය කරනු ලබනා රූපවාහිනී වැඩසටහන් සඳහා, රස කැවිලි, ආහාර වර්ග, ආයුර්වේද වෛද්‍ය ක්‍රම, අලුත් අවුරුදු සිරිත් විරිත් පිළිබඳවූ දැනුම අහිමි කිරීම, 

සහ තවත් නොකී වැරදි ගණනාවක් මගින්, ඔවුන්ගේ සිත් රිදවීම, ඔවුන්ව අපහසුතාවයට පත් කිරීම, ඔවුන්ගේ බලාපොරොත්තු කඩ කිරීම, කෙටියෙන්ම, නගරවාසී ඉහළ මධ්‍යම පාන්තික හා ධනවත් ජනතාවට, ගම විඳීමට, සිය නිවාඩුව ගත කිරීම උදෙසා ගමට යාමට, එසේ නැතහොත් ඔවුන්ගේ පහසුව, අධ්‍යාපනය, වින්දනය, අලෙවිය සඳහාම වූ ගම විනාශ කර දැමීමේ අති භයානක, අති අමානුෂික වරදට, ස්ව්භාවධර්මෙලාගේ ගැමියා නම් වූ යුෂ්මතාව ප්‍රාණය නිරුද්ධ වනතෙක් එල්ලා තැබීමට මේ උත්තරීතර අධිකරණය වෙනුවෙන් මම මෙසේ නියෝග කරමි.

ඔබ සැමට සුබම සුබ අලුත් අවුරුද්දක් වේවා !! 


~~ සෙන්නා / 13.04.2014

රැක් එක අවුල්....

  2023.07.15 දුර ගමනක් යෑමට පෙර වාහනයේ අඩුපාඩු සාදාගෙන යාම නුවනැති ක්‍රියාවකි. සමහරුන් එසේ නොකරති. ආරක්ෂාව ගැන නොසිතති. වාහනයේ අඩු පාඩු සාදා...

Search This Blog