බෝතලේ විත්ති | අලියා පිටේ කටුස්සා.....

2013 බක් මස 20 වනදා

Source : http://www.lankajournal.com/

"මල්ලීඊඊඊ අන්න එනෝ....." ඒ ලොකු අයියාගේ හඬයි..

නැන්දාගේ පරණ ශ්‍රී සඟරා මිටිය අවුස්සාගෙන අමුතුම ලෝකයක මනසින් සැරිසරමින් සිටි මා, පියවි ලෝකයට ආවේ ඒ හඬිනි.

"මල්ලී අන්න අලියා එනවා"යි කියමින් ලොකු අයියා සහ සේන පඩි පෙළෙහි පහතට දිවීම ඒ වනවිටත් අරඹා තිබුණි. ශ්‍රී සඟරා ගොඩ පසෙකට හෙළු මමද දෙවරක් නොසිතාම ඔවුන් පස්සෙන් වැටුණෙමි.

තනිකරම කළුගල් එකටෙක පුරුද්දා, බදාම කිසිවක් භාවිත නොකොට සාදා තිබුණු පඩි අනූ පහකින් සමන්විත ඒ දැවැන්ත පඩිපෙළෙහි අප තිදෙනා වේගයෙන් පහතට බසිමින් සිටියහ. අද මතක් වන විට ලොමුදැහැගැන්වී ගියද, එවකට අපට ඒවා ගැන එතරම් ගනිච්චියක් නොතිබුණි. සමහර කළුගල් ගැලවී අඩමානයටද තීබූ බැවින්, වැරදීමකින් හෝ එම ගලක පය තැබීමෙන් විය හැකිව තිබූ විනාශය අතිමහත්ය. උදේ හවා ඉහළ පහළ සැරි සැරීම නිසාම අපට පඩි පෙළෙහි සවිමත් ගල් මොනවාද, බුරුල් ගල් මොනවාද යන්න හොඳ අවබෝධයක් තිබුණද, වැරැදීමකට එක් නිමේෂයක් ප්‍රමාණවත් බැවින් මෙම ශීඝ්‍ර පල්ලම් බැසීම අති අවදානම් බව සක්සුදක් සේ පැහැදිලිය.එහෙත් එවකට ඒවා තැකුවෝ අප නොවෙති.

පඩිපෙළ දෙපසම වූ බෑවුමෙහි වූයේ නනා ප්‍රකාර ගස් වලින් වැසීගිය වන බූටෑවයි. සරපයන්ට ඇති බිය නිසා අප එම පෙදෙසේ නිතර සැරිසැරුවේ නැති වුවද, වැඩිහිටියන් යාමෙන් ඒමෙන් ඇතිවූ අඩි පාරවල් පඩි පෙළෙහි මධ්‍යයේ සිට ඒ කැලෑ රොද තුළට විහිදී තිබුණි. 

සීයාගේ නිවසේ සිට මෙම කැලෑරොද ඔස්සේ පහත බැලූ විට පහතින් වූ තාර දැමූ පාරෙහි යන එන දෑ මැනවින් දැකිය හැකිය. නිවසේ සිට,පාරෙහි ගමන් කරන බස් රථවල බඳෙහි ඉහතින්ම සඳහන් කොට ඇති අංක කියවීමද, ඊළඟට එන බස් රථයේ අංකය කුමක්දැයි අනාවැකි කීමද එකල අපගේ විනෝදාංශයන්ගෙන් සමහරකි. ලොකු අයියා විසින් අලියාගේ ආගමනය නිරීක්ෂණය කළේද ඒ ආකාරයටමය.

විනාඩි පහක් වැනි කාලයක් තුළ අප පඩි පෙළෙහි පඩි හැත්තෑවක් පමණ බැස තිබුණි. ආරක්ෂාව පතා එතනින් නතර වීමට අප අදහස් කළෙමු. අපගේ මේ උත්සහය පරීක්ෂණයක් කොට බැලීමටය. මේ සඳහා මීට වඩා අනගි අවස්ථාවක් හෝ යහපත් පරිසරයක් උදා නොවෙන බව අප තිදෙනාටම ඉතා විශ්වාසය.

කුමාරතුංග මුනිදාස සූරීන්, හීන්සැරය ලියා අලියාට ඇතිකළ ලැජ්ජාව පිළිබඳව මා සිතෙහි එතරම් ප්‍රසාදයක් නොතිබුණි. ඔහු කෙතරම් උත්සහ කළත් කටුස්සා වීරයෙක් ලෙස දැකීමට මම කවදත් මැලිවුණෙමි. අපගේ මේ උත්සහය, එවකට අප අතර පැවති මිථ්‍යා මතයක් වූ අලියෙකුට "අලියා පිටේ කටුස්සා, අලි හොඬවැල ගෙනිච්චා" යැයි ඇසෙන්න කීමෙන් අලියා ප්‍රකෝප වී පහර දීමට දිව එනවා යැයි යන්න සැක හැර දැන ගැනීමටය. 

එම පරික්ෂණය සඳහා මීටත් වඩා සුදුසු ස්ථානයක් ඔබට සිතා ගත හැකිද? අලියෙකුට කිසි කලෙකවත් පැමිණිය හැකියැයි සිතිය නොහැකිවූ පඩි පෙළක, විසි පස්වන පඩියේ සිට මෙය කීමෙන් අපට ආරක්ෂිතව මෙය අත්හදා බැලිය හැකිය. යම් හෙයකින් අලියා ප්‍රකෝප වී පඩිපෙළ දිගෙහි දිව ඒම ඇරඹුවහොත්, මුලින් සඳහන් හරස් අඩි පාරවල් ඔස්සේ දිවීමට අප සැලසුම් කොටගෙන සිටිහය. අලියා පඩිපෙළෙහි ඉහළට දිව ආවත්, හරහට හැරී අඩි පාර ඔස්සේ බෑවුමෙහි ගමන් කිරීම කෙසේවත් කළ නොහැකි බව අපගේ පුංචි මොලවලටද වැටහීතිබුණි.

තවම අපට අලියා දර්ශනය නොවේ. එහෙත් තාර පාරෙහි වූ කන්ද නගින අලියාගේ ගෙජ්ජි හඬ අපට හොඳින් ඇසුණි. මොහොතකින් අලියා සහ උගේ පිටෙහි නැගී හෙල්ලයක්ද හෙණ්ඩුවක්ද අත දරා සිටින ඇත්ගොව්වා අපට දර්ශනය විය.අලියා දෙපසට වැනෙමින් ලතාවකට කන්ද නගිමින් සිටියේය. දැන් අපගේ වාරයයි.. අලියා පඩි පෙළ පසු කොට නොපෙනී යාමට පෙර අපගේ අත්හදා බැලීම කළයුතුය.

"මල්ලි ඔයා කියන්න" අයියා යෝජනා කළේය.. එහෙත්, සියල්ල අපට වාසිදායකව ඇතැයි පෙනුනද, ඒ සඳහා මට තවමත් එඩියක් නොවුණි.අවසානයේ එම නිර්භීත ප්‍රකාශයය අයියාගේ මුවින්ම පිට විය.

"අලියා පිටේ කටුස්සා, අලි හොඬවැල ගෙනිච්චා..." යි ඔහු සාමාන්‍ය හඬින් කීය. අලියාගෙන් ප්‍රතිචාරයක් නොවුණි. එය නෑසෙන්නට ඇතයිඋපකල්පනය කළ ඔහු නැවතත් උස් හඬින් එයම කීවේය. ඇත්ගොව්වා හැරී අප දෙස බැලූ බැවින් මෙවර එය එම ප්‍රදේශයට සම්ප්‍රේෂණය වූ බව අපට සහතික විය. එහෙත් අලියාගෙන් ප්‍රතිචාරයක් නොවුණි. එයින් එඩි ලද මා සහ සේනද උස් හඬින් කෑ ගසා එයම ප්‍රතිරාවය කළහ.එහෙත් අලියා වගේ වගක් නැතුව ගමන් කරයි. ඉන් පසු අප තිදෙනාම එකතුව හැකිවෙර යොදා එය ප්‍රතිරාවය කළේ අලියාට හොඳින් ඇසීම උදෙසාය. එහෙත් ඌ අප දෙස හැරී බැලීමට තරම්වත් උනන්දු නොවුණි. ඇත්ගොව්වා සිනා මුවින් යුතුව අපදෙස බලමින් අලියා සමඟ පඩි පෙළ පසු කොට ගියේය.

"මමනම් කියන්නෙ ඌ බීරි අලියෙක්"

"එහෙම කියන්න බෑනෙ, සමහර විට අර කතාව බොරු වෙන්න ඇති"

"නැත්නම්, හීලැ අලින්ට ඕක කියලා වැඩක් නැද්ද දන්නෙ නෑ"

ඔය, ඉන්පසු අප අතර වූ පරීක්ෂණයේ ප්‍රතිඵල විශ්ලේෂණයයි.

කෙසේ නමුත්, මෙම අලියා හොඳින් කන් ඇසෙන එකෙකු බවත්, තමන්ගේ පයටවත් නෝතේරෙන සතකු ගැන කීමෙන් අලියා නොසැලෙන බවත් මගේ පිළිගැනීම විය. කුමාරතුංග මුනිදාස සූරීන් කියන තරම් අලියා කටුස්සාට බයක් නැතැයි එකහෙළා පිළිගැනීමට මෙයින් පසු මම අදිටන් කොට ගතිමි. 

~~අවසානය මෙය නොවේ~~

ප.ලි. : මෙය කතාවක් නොව, ළමයෙකුගේ මතක එකතුවකින් කොටසක් පමණකි.

ලියුවේ :

~~ සෙන්නා / 20.04.2013
http://kurundha.blogspot.com/2013/04/blog-post.html