හඳුන්කූරු වෙළෙන්දිය

 

ජුනි 15, 2024

අපගෙ මුල්ම නැවතුම වූයේ ඇම්බැක්කේ දේවාලයයි. එය කලින් සැළසුම් කළ ගමනානතයක් නොව හදිසියේ මගදී දුටු නාමපුවරුවක් ඔස්සේ ලඟා වූ නැවතුමකි. කාලයක් සිට නැරබිය යුතු ස්තාන ලයිස්තුවේ අංගයක් වූ මෙම ස්තානනයට මෙලෙස හදිසීයේ, අහම්බයෙන් හෝ  පැමිණීමට හැකිවීම සතුටට කාරණයකි.

පුංචි බැවූම නැග දේවාලය කරා වූ මාවත දිගේ අප පිය මනින විට අරලිය ගසක් යට සිටි ඇය අප වෙතට ප්‍රවේශ වූවාය. මගේ මතක නිවැරැදිනම් ඇය සැළකියයුතු පිළිවෙලකට ඇඳුම් ඇඳ සිටියා. ඒ ඇය සතු උපරිම සහ හොඳම ඇඳුම විය යුතුය. නමුත් එය පිරිසිදුය, පිළිවෙලය. 

"අනේ මහත්තයා හඳුන් කූරූ පෙට්ටියක් අරන් අපිට ආධාරයක් කරන්න. මට ළමයි දෙන්නෙක් ඉන්නවා මහත්තයා මේකෙන් තමා ඒගොල්ලන්ට කන්න බොන්න ඉගන ගන්න වියදම් කරන්නෙ. අපිට වෙන ආදායම් මාර්ගයක් නෑ මහත්තයෝ. මේ ළමයින්ගෙ තාත්තා ගහකින් වැටිලා එක් තැන් වෙලා ඉන්නෙ. එයාගෙ බේත් වලටත් වියදම් කරන්නෙ මේකෙන් හම්බෙන ආදායමෙන් තමා. මහත්තයලා අපිට අනුකම්පා කරලා අනේ හඳුන්කූරු පෙට්ටියක් අරගෙන යන්න". ඒ, කොළඹදී ආලෝක සංඥා පුවරු අසල අනන්තවත් දැක ඇති, විකිණීමට නොව සිඟාකෑමේ මෙවලමක් ලෙස හඳුන්කූරු අතේ තියාගෙන සිඟමන් යදින යාචකයන් දැක ඇති මාගේ සිතේ හඳුන්කූරු පෙට්ටියක් රැගෙන අප වෙත පැමිනෙන ඇය දැකීමෙන් පහල වූ සිතිවිලිය.

"මහත්තයලා දේවාලෙට නේද යන්නෙ? හඳුන්කූරු පෙට්ටියක් අරන් යන්න මහත්තයා. මේවා බොහොම සුවඳ හඳුන් කූරු. අපි ගෙදරමයි හඳන්නෙ. එක පාරක් අරගෙන බලන්න. මේ එක කූරක් පැය දෙකක් විතර ඇවිලෙනවා. දිගටම සුවඳ තියනවා. මේවා අපිමයි හදන්නෙ. දේවාලෙ පත්තු කරන්න බොහොම හොඳයි මහත්තයා. එහෙම නැත්තම් ගෙදර ගෙනිහිල්ලා පත්තු කරලා බලන්න. සුවඳ ජාති හතරක් තියනවා. ඔය කඩේ තියන කොයි ඒවටත් වඩා මේවා හොඳයි. එක පාරක් පාවිච්චි කරොත් මහත්තයලට වෙනස් තේරෙයි." ඒ සිය නිෂ්පාදනය මහත් ආඩම්බරයෙන් අප වෙත පිළිගන්වූ ඇයගේ සැබෑම වචනයි. 

හඳුන්කූරු පෙට්ටියකට මුවා වී සිඟමනේ යෙදෙන සොරුන් මෙන් නොව ඇය ජීවිතය ජීවත් කරවීම වෙනුවෙන් උත්සහයෙන්, මහන්සියෙන් ව්‍යාපාරයක නිරතවන දිරියවන්ත කාන්තාවක් බව වටහා ගැනීමට ඇයගේ මේ වචන පමණක් ප්‍රමාණවත්ය. එම නිසාම අවශ්‍යයතාවයක් නොතිබුනද හඳුන්කූරු මිලදී ගැනීමට අප තීරණ කළහ. ගනුදෙනුව අවසානයේ ඇය විසින් අප වෙත රුපියල් දහයක් ඉතිරි දිය යුතු විය. එය අවශ්‍යය නැතැයිද, ඇයට තබාගන්නයයි ද පැවසූ විට " නෑ නෑ මහත්තයා එහෙම කරන්න බෑ, ඔහොම ඉන්න ඉතුරු දෙනකම්" යැයි කී ඇය අවසාන සතය දක්වාම ඉතිරි මුදල් බේරුම් කළාය.

සිය දිරියෙන් නිපදවන හඳුන්කූරු අලෙවි කිරීම ආඩම්බරකාර ව්‍යාපාරයක් කරගත් ඇය, හිස් හඳුන්කූරු පෙට්ටි පෙන්වමින් සිඟමනේ යෙදෙන යාචකයන් හට කදිම ආදර්ශයක් නොවන්නේදයි සිතමින්, මෙවන් වූ මිනිසුන් තවමත් මේ රටෙහි සිටීම ගැන ඇතිවූ සොම්නස් හැඟිමෙන්ද යුතුව අප දේවාලය කරා පිය නැඟූහ.

අදටත් ඇය හෝ ඇයගේ ව්‍යාපාරයේ යම් අයෙකු එම ස්තානයෙහි හඳුන්කූරු අලෙවි කරණවා විය හැකිය. බොහෝ විට ඇය සිය ව්‍යාපාරය ඊළඟ අදියර තෙක් ඔසවා ඇතිවාට නිසැකය. ඔබත් ඇම්බැක්කේ දේවාලයට ගියහොත් ඇයගෙන් හඳුන්කූරු මිලදී ගැනීමට දෙවරක් නොසිතන්න. ඒ වෙන කිසිවක් නිසා නොව ඈ පැවසූ පරිදිම ඇයගේ හඳුන්කූරු ඉතා උසස් තත්ත්වයේ ඒවා බැවිනි.

නිමි.

ලියුවේ;

සෙන්නා / 15.06.2024

AI සහ ඒ ඇයි?

 

2024-ජුනි-10

"Humans fighting with AI" Copilot දන්න විදිහ.

AI හෙවත්  කෘත්‍රිම බුද්ධිය යනු මේ දිනවල කා අතරත් නිතර භාවිතා වෙන යෙදුමකි. Open AI සමාගම එළි දැක්වූ chatGPT යෙදවුමත් සමඟින් තරඟයට මෙන් කෘත්‍රිම බුද්ධි භාෂා යෙදවුම් එළිදකින්නට වූහ. ගූගල් සමාගම මගින් Gemini ද, Microsoft සමාගම මගින් Copilot ද ආදී වශයෙන් විවිධ නාමයන් යටතේ බොහෝ භාෂා යෙදවුම් එළිදැක්වුන අතර මේ මගින් බොහොමයක් දෙනාගෙ කාර්‍යයන් පහසු විය. මෙයට අමතරව අති විශාල වූ ක්ෂෙත්‍රයන් ගණනාවකට සිය අති කාර්‍යක්ෂම දායකත්වය ලබා දීමට කෘත්‍රිම බුද්ධිය මේ වනවිට සමත් වී ඇත. සෞඛ්‍ය‍ය, ප්‍රවාහණ, මූල්‍ය‍ය, නිෂ්පාදන හා සැපයුම්දාම, කෘෂිකර්මාන්තය, බලශක්ති, විනෝදාස්වාද, අධ්‍යාපන ආදි ලෙස පෘතුලව විහිදී ගිය ක්ෂේත්‍රයන් ගණනාවක සිය අක්මුල් විහිදා අණසක පැතිරවීමට මේ වන විට AI හෙවත් කෘතිම බුද්ධිය සමත්වී ඇත.

මේ හේතුව නිසාම මේ වනවිට සමාජයේ කෘත්‍රිම බුද්ධිය පිළිබඳව විශාල බියක් හට ගැනෙමින් පවතින අතර බහුතරයකගේ අදහස වන්නේ කෘත්‍රිම බුද්ධිය විසින් සියළු රැකියා අවස්තා අත්පත්කොට ගෙන සමාජයේ අති විශාල රැකියා වියුක්තියක් ඇතිකරවනු ඇති බවකි. Open AI සමාගමේ සම නිර්මාතෘවරයෙකු වූ ද, ලෝක ප්‍රජාව කෙරෙහි ඉමහත් බලපෑමක් කළ හැකි පුද්ගලයෙකු වූ ද, එලෝන් මස්ක්, එයිනුත් ඔබ්බට යමින් කෘත්‍රිම බුද්ධිය න්‍යෂ්ඨික අවි වලටද වඩා භයානක විය හැකි බවට කළ අනතුරු හැඟවීම් මේ සඳහා අති විශාල වශයෙන් පිටිවහලක් වූවා නිසැකය.

ප්‍රකට රචකයෙකු වූ චානුක වත්තේගම විසින් මෑතකදි පළකළ ලිපියකින් සාකච්චා කෙරුනේ, කාල් මාක්ස් විසින් ඇදි සමාජයේ පංති බෙදුම් රේඛා කෘත්‍රිම බුද්ධිය විසින් යලි තහවුරු කරමින් සිටිනා බවකි. කෘත්‍රිම බුද්ධිය විසින් සමාජයේ පහල පන්තීන් වෙත එල්ල කරණු ලබන පීඩනය මගින් සමාජයේ දරුණු පංති විශමතාවයක් ඇති කරවනු ඇති බවට ඔහු අනුමාන කරයි.

මානව සමාජය යතුරු ලියන යුගයේ සිට පරිගණක යුගය දක්වා විතැන් වෙන විට මෙවැනිම වූ හා හෝවක් සහිත වටපිටාවක් පවතින්නට ඇතැයි යන්න අපගේ පුද්ගලික අදහසයි. යතුරු ලියන යන්ත්‍ර ක්‍රියාකරු, නඩත්තුකරු, උපාංග සපයන්නා, පුහුණුකරුවන් ආදී සියලු වෘත්තීන් මිහිතලයෙන් අතුගා දැමීමට පරිගණකය සමත් වී ඇත. ඒ අනුව බලන කල්හී කෘත්‍රිම බුද්ධිය සම්බන්ධයෙන් ඇති බිය සාධාරණය. වර්තමානයේ පවතින බොහොමයක් වූ වෘත්තීන් සහ සේවාවාන් මිහිතලයෙන් වද කර දැමීමට කෘත්‍රිම බුද්ධිය සමත්වනවා නොඅනුමානය. කෙසේ වෙතත් යතුරුලියනය හා සබැදි රැකියා අහෝසිකර දැමූ පරිගණකය, එකල සිතා ගැනීමටවත් නොහැකි වූ නව රැකියාවන් මහා රාශියක් පරිගණක භාවිතය හරහා නිර්මාණය කළ ආකාරයෙන්ම, මෙකල අපට අනුමාන කිරීමටවත් නොහැකි තරම් විශාල නව රැකියා සංඛ්‍යාවක් කෘත්‍රිම බුද්ධිය විසින් ද නිර්මාණය කරණු ඇති බව අපගේ අනුමානයයි. 

චාර්ල්ස් ඩාවින්ට අනුව වෙනස්වන පරිසරයේ නොනැසී පැවතීමට පරිසරයට අනුගත වීම අත්‍යාවශ්‍ය‍ය සාධකයෙකි. සිය දැනුම, යතුර ලියන යුගයේ සිට පරිගණක යුගය හරහා කෘත්‍රිම බුද්ධි යුගය දක්වා දියුණු කරගන්නා කෘත්‍රිම බුද්ධි අභියෝගයට හොඳින් මුහුණ දෙණු ඇති. 

කෘත්‍රිම බුද්ධිය විසින් අනාගතයේ උත්පාදනය කළ හැකි නව රැකියා අවස්තා පිළිබඳ කෘත්‍රිම බුද්ධි යෙදවුමක (chatGPT) අනුමාන කිරීම පහත පරිධිය.

AI-Specific Roles

1. AI Ethicist:

   • Focuses on ensuring AI systems are designed and implemented ethically.
   • Addresses issues like bias, transparency, and fairness.

2. AI Trainer:

   • Works on training AI systems by providing labeled data and refining algorithms.
   • Ensures AI models are accurate and effective.

3. AI Maintenance Engineer:

   • Specializes in the ongoing maintenance and optimization of AI systems.
   • Addresses performance issues and updates models as needed.

Tech and Engineering

1. Machine Learning Engineer:

   • Designs and implements machine learning models.
   • Works with large datasets to train algorithms for specific tasks.

2. Data Scientist/Analyst:

   • Analyzes data to extract meaningful insights and patterns.
   • Develops predictive models to support business decisions.

3. Robotics Engineer:

   • Designs and builds robots integrated with AI for various applications.
   • Focuses on automation, efficiency, and precision in manufacturing and other sectors.

Industry-Specific Roles

1. Healthcare AI Specialist:

   • Develops AI applications for medical diagnostics, treatment planning, and patient care.
   • Works on predictive analytics for disease prevention and management.

2. Agricultural AI Technician:

   • Implements AI solutions for precision farming, crop monitoring, and yield optimization.
   • Uses AI for predictive analytics in agriculture.

3. Financial AI Advisor:

   • Develops AI tools for risk assessment, fraud detection, and automated trading.
   • Uses AI to provide personalized financial advice to clients.

Creative and Design

1. AI-Driven Content Creator:

   • Uses AI tools to generate content such as articles, music, or art.
   • Collaborates with AI to enhance creativity and productivity.

2. Virtual Reality/Augmented Reality Developer:

   • Integrates AI into VR/AR experiences for more immersive and interactive applications.
   • Develops educational, gaming, and training simulations enhanced by AI.

Customer and Human Interaction

1. AI Customer Support Specialist:

   • Manages AI-driven customer service platforms.
   • Ensures AI systems provide accurate and helpful responses to customer inquiries.

2. Human-AI Interaction Designer:

   • Designs interfaces and experiences for seamless interaction between humans and AI systems.
   • Focuses on usability and user experience.

Policy and Regulation

1. AI Policy Advisor:

   • Develops regulations and policies for the ethical use of AI.
   • Advises governments and organizations on AI governance.

2. AI Compliance Officer:

   • Ensures AI systems comply with laws, regulations, and ethical standards.
   • Monitors and audits AI implementations for compliance.

Education and Training

1. AI Educator/Trainer:

   • Teaches AI and machine learning concepts to students and professionals.
   • Develops educational materials and courses on AI technologies.

2. AI Curriculum Developer:

   • Designs and updates educational curricula to include AI and related technologies.
   • Ensures students are prepared for AI-driven job markets.

ඔබගේ පරිඝනකයෙ ඇති කෘත්‍රිම බුද්ධි යෙදවුම, ඔබගේ දැනුමෙන් තොරව, ඔබගේ අනුමැතියකින් තොරව, E-Mail පනිවිඩ වලට පිළිතුරු යවන දිනය දක්වා ඔබට කෘත්‍රිම බුද්ධිය පිළිබඳ බිය වීමට කිසිඳු කාරණයක් නොමැත. ඒ තාක් එය පසුවනුයේ මිනිසාගේ පාලනය යටතේය. එය මිනිසාගෙ පාලනයෙන් ගිලිහෙන දින බුද්ධිමය ලෝක සංග්‍රාමය ඇරබෙනු ඇති. එය ඔබව තුවක්කු නොදරණ සොල්දාදුවකු බවට පත්කරවණු ඇති. ඒ සඳහා සූදානම් වන්න. එම නිසා, කෘත්‍රිම බුද්ධිය ඔබගෙ රැකියාව අහිමි කරතැයි අනියත බියක් තබා ගත යුතු නොවේ.

ලියුවේ:

සෙන්නා / 10.06.2024.

හේතුව සහ අහේතුව......

මගෙ හඳහන බලපු ජෝතීර් උන්නැහේ කිව්වා මේ අවුරුද්දෙ මුල් මාස පහ ගෙවෙනකම් බ්ලොග් පෝස්ට් එහෙම දාන්න නෙමේ එහෙම හිතන්නවත් එපා කියලා. මාරාන්තික අපලයි කිව්වා. ඉතිං හුදී ජන පහන් සන්වේගය වෙනුවෙන් මාසෙට බ්ලොග් පෝස්ට් සීයක් හමාරක් දාන මට මේක කොච්චර අමාරු කාලයක් වෙන්න ඇති කියලද ඔහේලා හිතන්නෙ? බ්ලොග් පෝස්ට් නොදා මාස පහක් ඉන්නවා කියන්නෙ නිකං හුස්ම ගන්නැතිව ඉන්නවා වගේ වැඩක් නොවැ. ඉතිං ඕකට වග කියන්න ඕනා මම නම් එහෙම් නෙමේ අර ජෝතිෂ පොර තමා. 

බස් වල යනකොට කවදා හරි කාට හරි සීට් එක පූජා කරලා තියනව ද ? නිකං වයසක කෙනෙකුට, ගැබිනි කාන්තාවකට, ආබාධිත පුද්ගලයෙකුට, ලස්සන තරුණයෙකුට / තරුණියකට වගේ. එහෙම සීට් එක් ලැබිච්ච කෙනා, එයා බහින්න යනකොට ඔයා එයා ලඟම හිටගෙන ඉන්නකොට, වෙන කාට හරි කතා කරලා සීට් එක එයාට දීලා යාමේ අත්දැකීම එහෙම විඳලා නැත්ද? අපරාදෙ එහෙම විඳලා නැත්නම්. ඒක විඳින්නම ඕනා අත්දැකීමක්..

රැක් එක අවුල්....

 

2023.07.15

දුර ගමනක් යෑමට පෙර වාහනයේ අඩුපාඩු සාදාගෙන යාම නුවනැති ක්‍රියාවකි. සමහරුන් එසේ නොකරති. ආරක්ෂාව ගැන නොසිතති. වාහනයේ අඩු පාඩු සාදාගෙන නොගොස්, විශේෂයෙන්ම කඳුකරයට යනවිට එසේ නොගොස් විවිධ අනතුරු වලට මුහුණ දෙති. මම එසේ නොවෙමි. මගේත් අන් අයගේත් ආරක්ෂාව ගැන වෙසෙසින්ම සිතමි. හොඳ අය එසේය.😉

පසු ගිය උඳුවප් මහේ අප ඇල්ලේ සංචාරයක යෙදුනාහ. එයට පෙර වාහනයේ Wheel Alignment (මෙයට සිංහල වචනයක් Chat GPT මහතාගෙන් විමසූ විට " කකුළු සක්‍රය" යනුවෙන් පැවසුවේය. Bard මහතාගේ අදහසට අනුව එය "රෝද එකෙල්ල" වේ. ඔබ මෙයට පෙර මේ වචන අසා ඇතිද? මා නම් නැත. ) සකසා ගැනීමට ටයර් කඩයට ගියෙමි. එතන ඇතිවුන සංවාදය මෙසේය.

"මේකේ රැක් එකේ අවුලක් තියනවා. මේ පේනවද පොඩි ප්ලේ එකක් වගේ එකක් තියනවා මේ පැත්තෙ. මෙහෙම තියාගෙන wheel alignment  කරලා වැඩක් නෑ. මට ඕනනම් කරලා දෙන්න පුළුවන්, ඒත් වැඩක් නෑ."

"එහෙමද? ඔව් මටත් කම්පැනි එකෙන් කිව්ව රැක් එක මාරු කරන්න ඕනා කියලා, ලක්ෂ දෙකක් විතර යයි කිව්වා."

" අපෝ මේක මාරු කරන්න ඕනා නෑ හදන්න පූළුවන්. ඔයා යන්න මීගමුවෙ අහවල් තැනට*, එතන ගලවලා, ලේත් කරලා හොඳටම හදලා දෙනවා. ඕන නම් උපරිම විසි පහක් විතර යයි. බොරුවට ලක්ෂ ගනන් දීලා අලුත් ඒවා දාන්න එපා. කම්පැනි ඉතින් කියන්නෙ එහෙම තමා. ඒ ගොල්ලන්ගෙ බිස්නස් එකනෙ."

"ඔව් නේ. Thank you very much තැන කිව්වට. මම ගිහින් බලන්නම්. අපි හෙට ඇල්ලෙ යන්න ඉන්නෙ. මෙහෙම ගියාට අවුලක් නැති වෙයිද?"

"නෑ එහෙම අවුලක් වෙන්නෑ, ෂේප් එකේ ගිහින් එන්න පුළුවන්. හැබැයි කල් නොදා මේක හදා ගන්න."

නිවැරැදි මග පෙන්වීම පිළිබඳ ඔහුට ස්තූති කොට, ටයර සතරෙහි හුළං තත්ත්වයද පරික්ෂා කරවාගෙන එතනින් නික්මුණි.

ලියුවේ;

සෙන්නා / 15.07.2023

* පසු ලිවීම - මේ කියන අහවල් තැන මීගමුවේ Deemo Motors ය. කාට හරි අවශ්‍ය‍යනම් එතෙනට යන්න පූලුවන්. ඔවුන් බොහොම ප්‍රශස්ත මට්ටමේ සේවයක් සපයනවා. මෙය තෘප්තිමත් පාරිභෝගික ප්‍රතිචාරයක් මිස, ඔවුන් වෙනුවෙන් කළ වෙළඳ ප්‍රචාරණයක් නොවන බව සළකන්න.

මීටර් සියයක හැඟීම්

කැකිරාව කියලා ඇහුන ගමං මට මතක් වෙන්නෙ මීටර් සියය. මුදලිහාමි සපත්තුත් නැතුව දුවලා දිනපු තරඟෙ ගැන. ලොකු මහත්තයා එක්ක කොළඹ ගිය හැටි. හැබැයි මේ කතාවත් එක්ක බැඳුණු වචනයෙව් විස්තර කරන්න අමාරු පාළු, දුක්මුසු හැඟීමක් හිතට එනවා.

හත වසරෙදි අපේ පන්ති කළවම් කළා. මෙච්චර කල් එකට හිටපු යාළුවො කැඩිලා බෙදිලා ගියා. මාත් එක්ක හිටපු කට්ටියම එක පන්තියකට වැටිලා මාව වෙනම පන්තියකට වැටුනා. එහෙම වුනේ පුංචි පලිගැනීමකට. ඔය ළමයි බෙදන වැඩේ බාර දීලා තිබ්බෙ අපිට වැඩිය ජේෂ්ඨ පන්තියක හිටිය ශිෂ්‍ය නායකයෙක්ට. මිනිහට මාත් එක්ක පොඩි කෝන්තරයක් තිබුනා වෙන ආරෝවකට. මිනිහා අවස්ථාවෙන් උපරිම ප්‍රයෝජන අරගෙන ගානට වැඩේ දුන්නා.

ඒක මහ මුස්පේන්තු හැඟීමක්. ඉස්කෝලෙ යන්නත් එපා වුනා. දියෙන් ගොඩ දාපු මාළුවෙක් වගේ අලුත් පන්තියක, යාළුවො නැති පරිසරයක තනි වෙන එක හරි පාළු, දුක්මුසු හැඟීමක් ඇති කරවනවා. පුංචි හිතකට  දරාගන්න අමාරු හැඟීමක්. 

මීටර් සියය ඉගන ගත්තෙ ඔය පරිසරය යටතේ. මොකක් හරි නොදන්නා හේතුවක් නිසා අර දුක්මුසු, මුස්පේන්තුකම මේ කතාවත් එක්ක බද්ධ වෙලා තියනවා. අදටත් මීටර් සියය කතාව මතක් වෙද්දි අඩු නැතිව අර හැඟීම හිතට එනවා.

ටික දවසකට පස්සෙ මම බලෙන්ම ගිහිල්ලා මගේ අනිත් යාළුවො හිටිය පන්තියෙ ඉඳ ගත්තා. ඒ පන්තිය බාර ගුරුතුමත් කිසිම ගැටලුවක් මතුනොකර මගේ නම නාම ලේඛනයට ඇතුලත් කරගක්තා. හැබැයි අර ඇති වෙච්ච හැඟීම මකන්න ඒ ක්‍රියාවට පුළුවන් වුනේ නෑ. අදටත් ඒක එහෙමම අඩු නැතිව තියනවා.

මුුදලිහාම් උඹ හපනා. මට සතුටෙන් උඹේ හපන්කම් බලන්න එන්න නොවෙච්ච එක ගැන සමාවෙයන්. 

නිිිමි.

~~ලියුවේ /සෙන්නා.

මාර්තු 04, 2023.

පොලිස් කතාවක්...

 19.11.2022

"පොලිස්" නම දුටු සැනින් ස්ත්‍රීයකගේ බෙල්ලෙන් මිරිකා ඉදිරියට තල්ලු කරණ චිත්ත රූපයක් පාඨකයාට මැවෙන්නෙ නම්, ඒ රචකයාගේ ලිවීමේ දෝෂයක් නිසා නොව පොලීසියේම දෝෂයක් නිසා බව පාඨකයා දැනගත යුතුය. එය හැරුණු කල, තව තවත්, වෙන වෙනත් චිත්‍ර රූප මැවේ නම් ඒවා සම්බන්ධයෙන් ද රචකයාගේ වගකීමක් නොමැති බවත් පාඨකයා දැනගත යුතුම වන්නේ ය.

පස් වෙනිදා කාර්‍යාලයෙන් සංවිධානය කළ දානමය කටයුත්තක් වෙනුවෙන් කටුනේරියට යාමට සිදු විය. සිදු කළ යුතුම වූ වෙනත් වැඩ කටයුතු නිසා ඒ සඳහා කාර්‍යාලයෙන් පිටවීම ප්‍රමාද වූ අතර අනෙක් පිරිස කලින්ම පිටත්ව ගියහ. වේලාවට අදාල ස්ථනයට ළඟා විය යුතු බැවින් කොළඹ-කටුනායක අධිවේගී මාර්ගය ඔස්සේ යාම වඩා සුදුසුයැයි තීරණය කළෙන් එයට අවතීර්ණ විය. වේලාවට යා යුතු බැවින්, සමහර ස්තානයන්හීදී වේග සිමා උල්ලංඝණය වූ බව සඳහන් කළ යුතුය.

කටුනායක හුවමාරුවෙන් එළියට ආ විගසම අසල සිටි පොලිස් නිළධාරියෙකු අත දිගු කොට නතර කළේය. වම්පස වීදුරුව පහත් විය.

"සර්, කරුණාකරලා අර පැත්තෙ අයිනට කරලා නවත්තන්න. පරිස්සමින් බලලා ගන්න, අර ලයින් වලින් වාහන එනවා." වාහනය වම් පස තීරුවෙන් නතර විය. පොලිස් නිළධාරියා රියදුරු කවුලුව අසලට පැමිණියේය.

"සර්, ඇයි දන්නව ද නැවැත්තුවේ?" වරද අනුමාන කළ හැකි විය. 

"ඔබ තුමා ජා-ඇල පහු කරලා එනකොට එක තැනකදි 110ත් පහු කරළා ඇවිත් තියනවා. කරුණාකරලා මට ලයිසන් එක දෙන්න." බොහොම පැහැදිලි විධානයකි. රියදුරු බලපත්‍රය සහ අනෙකුත් ලියකියවිලි නිළධාරියා අතට පත්වීය.

"සර්, කරුණාකරලා පොඩ්ඩක් අතෙන්ට එනවද? දඩයක් ලියලා දෙන්නම්."

මෙයිට පෙර මාර්ග නීති උල්ලංඝණය කොට පොලිසියට අසුවූ අවස්තා නිතැතින්ම සිහියට නැගිනි.

"ඔයා කරපු වරද බොහොම බරපතල වරදක්. මේක කෙලින්ම උසාවි දාන්න ඕනා වරදක්. මම වෙන වරදක් දාල ලියලා දෙන්නම්. මොකද කියන්නෙ? මොකක්ද කරන්න ඕනා?"  ආදී වශයෙන් ගලා යන, වෘත්තීය ගරුත්වය කෙළසන, සුපුරුදු  වදන් මාලාව ඔබ බොහෝ දෙනෙකු අසා ඇතුවාට සැකයක් නොමැත. මෙහි ඒ කිසිත් නොමැත.

අදාල ස්තානයට යන විටත් තාවකාලික බලපත්‍රය ලිවීම අරඹා තිබුනි. ලියන අතර තුරම දඩය ගෙවිය හැකි ආකාරය, බලපත්‍රය නැවත ලබා ගත හැකි ආකාරය ඉතාම පැහැදිලිව විස්තර කර දුන්නේය. ඉතා සුහදය, නිහතමානීය. විශේෂම දේ නම්, දඩ කොළයක් ඒ අවස්තාවේදීම ලියා අතට ලබා දීමයි. පෙර අවස්තාවන් වලදී දඩ කොළය ලබාගැනීමට නැවතත් වෙනමම පොලීසියට ගොස් රස්තියාදු වීමට සිදු විය.

"සර්, මේක ගෙවලා ඇවිත් ලයිසන් එක අරගන්න. 100 පන්නලා යන්න එපා සර්, ඒක සර්ට වගේම අනික් අයටත් හොඳ නෑ." එය මින් පෙර නොවිඳි අමුතුම අත්දැකීමකි.

ඊළඟ ජවනිකාව දිග හැරෙන්නෙ දඩය ගෙවා බලපත්‍රය ගැනීමට ගිය අවස්තාවේදීය. පොලිස් ගොඩනැගිල්ල අසලට යන විට එහි ඇතුලේ කටයුතු කරමින් සිටි නිල ඇඳුමෙන් සැරසුනු නිලධාරීන් දක්නට ලැබුනි. නමුත් සියලු කවුලු වසා තිබුනු බැවින් විමසිල්ලෙන් බලමින් දොර සොයා යන්නට විය.

"ගූඩ් මෝර්නින් සර්, මෙහෙන් එන්න සර්." එක වරම පිටුපසින් විවර වූ කවුලුවකින් ඇසුනි. නිල ඇඳුමින් සැරසුනු, සුහද සිනාවකින සැරසුනු ප්‍රියමනාප නිලධාරියෙකු ජනෙල් කවුලුව අසල සිටගෙන සිටියේය.

"ලයිසන් එක ගන්න පුළුවන් මෙහෙන්ද?"

"ආ ඔව් සර්, කොළ දෙක දෙන්න සර්, මම මෙතනින් දෙන්නම්." තාවකාලික බලපත්‍රය සහ දඩය ගෙවූ රිසිට් පත ඔහු අතට පත් කෙරිණි. එය අතට ගත් නිළධාරියා තත්පර තිහක් ගතවීමට මත්තෙන්,

"මේක නේද සර්?"යි කියමින් රියදුරු බලපත්‍රය දැක්වීය.

"හරි, මේක තමා. බොහොම ස්තූතියි."

"හරි සර්, පරිස්සමින් යන්න සර්. බුදු සරණයි !" මේ වචන සියල්ලම ඔහුගේ මුවින් පිට වූ ඒවා බවට සහතික කරමි.

මෙය මින් පෙර අත්විඳි පොලිස් අත්දැකීම් වලට වඩා වෙන්ස්ම වූ අත්දැකීමකි. ඒ ශ්‍රී ලංකා පොලීසියදැයි සිතෙන තරමට ඔවුන් වෙනස්ය. මෙය, පොලීසිය පුරා බෝ විය යුතු වෙනසකි. එම නිලධාරීන්ට කරණ ගෞරවයක් වශයෙන් මේ සටහන ලියා තබමි. ඔබ, නම් ගම් නොදත් ඒ ගෞරවණීය නිළධාරින්ගෙන් කෙනෙකු හෝ දන්නෙ නම් මේ සටහන ඔවුන් වෙත යවන්න. ඔවුන් අගය කිරීමට ලක්විය යුතු සේවයක් කරමින් සිටිති.

මේ පිළිබඳ සැකයක් ඇත්නම් කළ යුත්තෙ කටුනායක අධිවේගී මාර්ගයට අවතීර්ණව රථයේ ත්වරකය මදක් වැඩියෙන් පෑගීම පමණකි. යම් හෙයකින් පිටවීමේදී යමෙකු ඔබගේ ගෙලෙන් අල්ලා තල්ලු කිසීමක් සිදු කළහොත් එය රචකයාගේ වරදක් නොව ඔබගේම වරදක් නිසා බව සැළකිය යුතුය.

නිමි.

ලියුවේ;

~~සෙන්නා / 19.11.2022

බයිසිකල් මතක..

බයිසිකල් හෙවත් පාපැදි අද කාලීන මාතෘකාවකි. ලොකු ලොකු සැප පහසු වාහනවල ගිය අයවලුන් අද බයිසිකලයට හා පොදු ප්‍රවාහනයට වැටී ඇත. එක් අතකින් මෙය එක්තරා සමාජවාදයකි. එහෙත් තවමත් සියයට සියයකින් නොවේය. තවමත් යමක් කමක් හෝ බලපුලුවන්කාරකම් ඇති අයවලූන් කෙසේ හෝ තෙල් ලබාගෙන සිය කටයුතු සුපුරුදු පරිධි පවත්වාගැනීමට සමත්ව ඇත. ඔවුන් සියල්ල හෝ බහුතරයක් ප්‍රමාදවී හෝ පාපැදියට ගොඩවනු ඇත.

බයිසිකලය පැදීම කලාවකි. ජීවිතය මෙනි. සමබරතාවය පවත්වා ගැනීම අත්‍යාවශ්‍ය‍ය. නැතහොත් වැටීම නියතය, ජීවිත්වීමත් සමබරතාවය පවත්වා ගැනීමක් නොවන්නේ ද? එය කම්බියක් මත බයිසිකල් පැදීමකි.

80 දශකයේ ළමා විය ගෙවූ අපට බයිසිකල මහා සතුටකි. එකල සයිකලයක් මිලදී ගැනීම එක්තරා මට්ටමකට සමාජ තත්ත්වය හඟවනා සංකේතයකි. මෝටර් රථ හෝ මෝටර් බයිසිකල් අද තරම් සුලබ නොවූ එකල, සෑම නිවසකම පාහේ බයිසිකලයක් වීය. බයිසිකලයක් මිලදී ගැනීම සෑම කුටුම්බයකම සිහිනයකි. එකල බයිසිකල් ගැනීමට සිහින දකිනා මිනිසුන්ගේ කතා ඇසුරෙන් ඒකාංඟික ටෙලි නාට්‍ය පවා නිපැයුනා මතකය.

එකල බයිසිකල් ලොවේ රජ්ජුරුවෝ "රැලේ" සයිකල්ය. "රැලේ" බයිසිකලයක් ඇති එකා පොරකි. ඩබල් පෝර්ක් "හම්බර්" රැලේට දෙවෙනි වූයේ නොවේ. චීන "ෆීනික්ස්", "ෆ්ලයින් පිජන්", ඉන්දියන් "හීරෝ", ජපන් "ලුමාලා" එකල ජනප්‍රිය බයිසිකල් සන්නාමයන්ය. පොඩි අයට "චොපර්" යනුවෙන හැදින්වූ බයිසිකල් වර්ගයක් ද තිබුණී. ගියර මාරු කළ හැකි, L අකුර හැඩති ආසනයකින් සමන්විත මෙය එකල යමක් කමක් ඇති අයවලුන්ගේ දරුවන් භාවිතා කළ බයිසිකලයෙකි. මේවාට අමතරව හැන්ඩල් එකට යටට කරකැවූ, ගියර් වීල් සහිත රේසින් සයිකල් ද වීය. ඒවා බහුලව භාවිතා කෙරුණෙ සයිකල් රේස් පදින්නන්ය.

බයිසිකල් පැදීමේ මූලික පාඩම බයිසිකලය තල්ලු කිරීමය. එය කාලයක් සිදු කෙරෙණු ඇත. දෙවෙනි අදියර වම් පැඩලයට ගසමින් ඉදිරියට යාමයි. තෙවැන්න පොල්ල යටින් පැදීමයි. සමහරුන් මෙය හැන්ඩ්ල් එක් දෑතින් අල්ලාගෙන කරණ අතර තවත් සමහරුන් සීට් එක දකුණූ කිහිල්ලෙන් හිර කරගෙන වම් අතින් හැන්ඩ්ල එක මෙහෙයවමින් ඉදිරියට යනු ලබයි. මම දෙවෙනි වර්ගයේ එකෙකි. එම ක්‍රමය පොල්ල උඩින් පැදීමේ ක්‍රියාදාමය පමා කරවනු ඇත.  ඒ වවුලකු මෙන් බයිසිකලයේ එල්ලී දකුණූ කකුල පොල්ලට උඩින් දමා ගැනිමට යාමේදි ඇතිවන සමබරතාවය ගිලිහීමෙන් ඇති කරවනු ලබන අධෛර්‍යය නිසාවෙනි. නමුත් ඒ කිසිවකට අප නතර කරවනු හැකි වූයේ නොවේ. නොදන්නා කිසියම් හේතුවක් නිසාවෙන් මුලින්ම බයිසිකලයේ පොල්ල උඩින පැදපු දිනය ලෙස 1987 දෙසැම්බර් 27 වනදා ලෙස මාගේ මතකයේ සඳහන්ව ඇත. එය නිශ්චිත මතකයක් නොවේ. නමුත් වසර නිවැරැදි විය යුතුය.

එයින් පසු එළබෙන්නෙ වැඩ දැමීමේ කාලයයි. මුලින්ම එක අතක් අත් හැර පැදීම, අත් දෙකම අතහැර පැදීම, ඩබල් දමා පැදීම, ට්‍රිබල් දමා පැදීම, හැන්ඩල් එක උඩ සිට පිටි පස්සට පැදීම, ලගේජ එක මත වාඩි වී පැදීම, ඉදිරිපස රෝදය ඔසවාගෙන පැදීම ආදී මෙකී නොකී සියලු වැඩ කෑලි අත් හදා බැලෙනු ඇත. ඒවා නිසා සිදුවූ අනතුරුද බොහොමය. තුවාල සිදුවීම් එමටය. නමුත් අපට නිදහස උපරිමයෙන් තිබිණී. මව හෝ පියා අපගේ පිටි පස්සෙන් එන පුරුද්දක් එකල නොතිබුනි. අපි වැරදි කරමින් උගෙන ගතිමු. නමුත් අපට ලැබුණු නිදහස අපගේ දරුවනට දීමට අප ඉගෙන නොගත්තේ මංද? කොතනක හෝ වරදක් වී ඇත.

එකල සෑම නිවසක්ම වින්කලයෙකි. පොඩි පොඩි අලුත් වැඩියාවක් කරගැනීමට අවැසි උපකරණ බොහෝ නිවෙස්වල තිබුණි. ටියුබ් එක ටයරයෙන් පන්නා, ජල පරික්ෂාවක් සිදු කොට සිදුර හඳුනාගෙන, පීරෙන් පිරිමැද සොලිසන් ගා, තවත් ටියුබ් කැබැල්ලක අලවා පැච් එකක් දමා ගැනීමේ හැකියාව එකල පොඩි උන් වූ අපටත් තිබිණි.

බයිසිකලය පැදීම ආස්වාදයක් වුවද එහි පොල්ලෙහි වාඩි වී යාම කරදරයෙකි. දකුණු කකුල හොලවා ගැනීමට බැරි තරම් හිරි වැටීම ලොකුම කරදරයෙකි. නමුත් නැවත රුධිරය ගමන් කිරීම ඇරඹී කකුල ක්‍රමයෙන් පණ ලැබීම ආශ්වාදය දනවන්නෙකි. ඒ මගින් නැතිවූ සෙරෙප්පු ගණන සැළකිය යුතු ගණනෙකි.

ලංකාව කාලයේ ආපස්සට ගමන් කිරීමේ දෝෂය නිසා මේ සහෘද්දයාට නැවතත් අපමණ අගයක් ලැබෙමින් පවති. මෝටර් රථ, මෝටර් බයිසිකල් තෙලේ බලය පෙන්වනා විට, අසරණ වූ මිනිසුන්ගේ පිහිටට නැවතත් බයිසිකල් පැමිණ ඇත. වින්කල් කරුවන්ද ගනන් උස්සමින් සිටී. ඒවටත් දැන් පෝලිම් ය.

බයිසිකලය අපූරු වාහනයෙකි. කම්මැලි නොවන මිනිසුන් එයට සැමදා පෙම් බඳිනු ඇත. එය තවත් කාලයක් මිනිසා සමඟ රැදෙනූ නිසැකය. 

ලියුවේ;

සෙන්නා / 04.07.2022.